(أ) حزام واحد من أجمل شياطين الشعر الذين لا شك أن لهم ارتباطهم بجنيات الشعر. فقط اقرأوا هذه الرائعة.

أبكتب... وأتغنّى واعسف المعنى مع الطاروق

أبكتب لين يزعل مني امس ويرتجف باكر

أبكتب لين تهرم كلمتي ويشيب فيّ الشوق

أبكتب لين تتعب مني الكلمات وأكابر

أبكتب لين يركع حرفي المغرم واسوقه سوق

أبكتب لين اشوف الشوف مني يحرق الناظر

أبكتب واحترق واطفي بنارك قلبي المحروق

أبكتب واحرق جروحك لو ان عيونك تناظر

أبكتب واسرق من عيونك اللي يخصني برفوق!

أبكتب لين يلمح شوفي بعينك خطا الشاعر

أبكتب لين تظلم في ضميري يا عديم الذوق

أبكتب لين ينشف وسط صدري زرعك الزاهر

أبكتب واحرق آخر حب لك في داخل المعلوق

أبكتب لين يبرى من غلاك البال والخاطر

أبكتب واشعل الظلما من سراج الهوى المخنوق

أبكتب لين ينهار الكلام بضوّه الساهر!

أبكتب لين اخيل الجرح ينبت في سماك بروق

أبكتب لين تمطر غيمتك يا جرحي الصابر!

أبكتب لين اعانق بك سنا ضيّ القمر وآروق

أبكتب لين اريّح خيل شعر العاشق السامر

أبكتب لين ترفضك المشاعر ملهم ومعشوق

أبكتب لين يلفظك النظر مع دمعه الهامر!

أبكتب لين اشوفك في خيالي تحتضر مشنوق

أبكتب لين اشيّع مع رفاتك غلطة الشاطر

أبكتب يمكن اني من كثر ما شفتْ منك آفوق

أبكتب لين جرحك ينطفي بالقلب ويهاجر

أبكتبها بقايا ذكريات العاشق المخلوق

أبكتب تحتها توقيع اسمي عاشق مسافر

(ب) منذ أن وعينا على هذا الصوت الملفت وهو يضعنا في مهب الحرج.ش