يا صاحبي غابت عليّ الشمس بأطراف النخيل

وامسيت اشوف الباسقات اللي تميل عذوقها

وانا عليّ بشت حساوي... لا قصير ولا طويل

والمزنة الغرا على راسي تلوح بروقها

والعالم الله يدرك العطشان منها سلسبيل

والا يوقف يومه الموعود قبل يذوقها

يا صاحبي... يا ناس... ياللي فوق يالوزن الثقيل

له النظر للعالم اللي ماتبل حلوقها

والعمر مره والقلوب البيض ما تبغي دليل

والناس اذا طابت نوايها تطيب وفوقها

لو كل من سمى (نبيل) يصير مثل اسمه نبيل

سميتها (ليلى) على ليلي... وانا معشوقها

كذا كذا... (يا حرفة التمويه في نعش القتيل)

يا صاحبي اغمض عيونك وادفنه في موقها

وانا تعبت من الحجاج السمح والكف البخيل

ولا عندي حل اعالجها... واخيط فتوقها

صحيح انا ممكن اسويها... واسوي المستحيل

لكن رجلي في هوى نفسي... ما عاد اسوقها

وشلون ابرر موقفي واجزا جميلك بالجميل

وانا يديني في فم الحيه... ورجلي فوقها