لي صاحب (ن) كان يرعى داخل اضلاعي

وما قد منعته ولا عيبت بأطباعه

اصبر على زلته واتحمل اوجاعي

وأقول ذا القلب ملكك كثّر اوجاعه!

كافحت واعطيت حتى شانت اوضاعي

والمشكلة يوم شانت زانت اوضاعه!

تبدلت نبرته في داخل اسماعي

وداس الغلا والولا والروح ملتاعه

شاف انّ قربي منه ما عاد له داعي

واعلن رحيله بعد ما حقق اطماعه

وليته تركني ولا عيب في اطباعي

ليته حفظ بعض بعض الود ما باعه

لكن قهرني وحاول يلوي ذراعي

من عقب عهد الوفا والسمع والطاعه

وهذي قصيدة شموخ بدفتر ابداعي

اكسر بها عزّته وألوي بها ذراعه

لا صارت الشاة تنطح جبهة الراعي

فالله يسهل علينا قامت الساعه!!