إذا لـ «الليل» باب وْفي صدى تهليلي المفتاح

وش اللي يجبر اغصون القوافي تبتهل عنّي؟

عروقي... ليه محرابي عقيم وشلّتي أشباح؟

وليه الشمس... تخجل وجنتيها لا دنتْ منّي؟

انا «طلحٍ» غزتني فتنةٍ عميا بليّا سلاح

انا إحساس مُنكر بس «هيل» العشق يطحنّي

صحيح اني تعلّقت ابسحابٍ ما قواني وطاح

وشفت اسمي معا «طيحة كياني» راهب ايغنّي

«رصيف الشوق» يلهب عزتي لين اسرج المرواح

أجي بكامل قواي احمل «ورود الحب» في ظنّي

نفضت اغبار حزني لين جلدي من عَنَايه صاح

على كف الغمام اللي: بدمْ «البيد» متْحنّي

تفضّل يا ضياعي واشبك الليله بْدون اجناح

هقيتك لابسٍ «ثوب الكرامه» يوم تحضنّي

غرس جَدّي تراتيل الوفا في داخل وارتاح

تعال وشوف يا جدي وش اللي باقيٍ منّي