طعنتين

أخذتها طعنتين اقبال واقفايه

لين افتحت لي مداين قبل منسيّه

جبت البخور وسحرتْ الطيف بمرايه

لاجل التماني تعيش احلام ورديه

عبيد الدبيسي

زماني

أنا يا بنت لي دربٍ خويّه حيث يقسم له

ومالي والخوي اللي شعاعه رث وحيادي

تركته في هبوب الصعلكه وثيابه السمله

زماني، ما غفلت فْـ داخلي عن تربة اجدادي

عواض العصيمي

أمي

انتي امي وابوي وعيني اللي تشوف

وانتي قلبٍ خفق من يوم شفتك وذاب

وانتي احلى خيالٍ ثابت بالطيوف

من عرفتك قبالي ما محاه الغياب

عبدالعزيز المتعب

الشبابيك

من سما قلبي تهادت شمس طيفك

الشبابيك: الضلوع... الباب عيني

تصهل الذكرى غزاني حد سيفك

خيل هالذكرى حوافرها سنيني

الأصيل

ملعون

ملعون ابو هالشعر في كل ملّه

ان كان صار (فلان) ما احدٍ يضاهيه

يا شاعر الابداع شمسه وظله

هو عاد به في هالزمن شي ترجيه؟

عبدالرحمن بن مساعد

أنتثر

تثير بْيَ الجنون وأنتثر لك شوق يا جدّي

تشب بْيَ المحاني واحترق كلي على شانك

على زند الرجوله واقفه يا شيخ من قدّي؟

زهيت بميزةٍ ذلّتْ شموخك لي وعصيانك

الراسيه