ويش رايك نهرب من المدرسة في الفرصة؟
- حقوي؟
عشان انروح نتريق من المطعم إللي صوب المدرسة.
- انزين الأكل ماله مو تمام.
مو مشكلة بنشوف لينا مطعم ثاني.
- انزين حقوي ما تشتري من المقصف؟
ما أحب اشتري من اهني.
- ليش؟
بس جدي، أنا بيني وبينك أفادي أهرب.
- يعني انت بس تبغي تهرب؟
إيه، لصبيان إلي ويايي كله يهربون من المدرسة، وإذا نسولف وية بعض يفوشرون عليي، ويقولون أنا جبان.
- انزين قول ليهم أنا مو جبان وخلاص، يعني ما يحتاج تهرب.
لا مي عدلة، يعني تبغاني أشلخ عليهم، أنا إذا قلت ليهم مو جبان لازم أثبت ليهم، شلون أثبت؟
- سو أي شي، بس مي عدلة تهرب.
ويش أسوي يعني، إذا بصير شجاع لازم أسوي شي مهم، يعني أتشابق وية المدرس، مثلاً، أتشابق وية واحد من لصبيان لقواي وأغلبه، أصورخ في الصف إذا جا الأستاذ، أو أهرب، وأنا صراحة مو قوي، يعني الأستاذ ما أقدر عليه ولا لصبيان لقواي، ولا أقدر أصورخ على الأستاذ لأني أخاف منه، فما عندي إلا الهربة.
- انزين بس جدي يمكن يشوفك الأستاذ ويضربك.
لا ما بيشوفني.
- ويش دراك.
لأني عندي فكرة عجيبة.
- ويشو؟
ما بهرب في الفرصة.
- عجل متى؟
بهرب في الهدة.
- شلون يعني؟
إي، في الهدة ما بطلع من الباب، بشكح السور وبهرب.
- انزين هجدي بيقولون عنك خمبول، يعني الباب امبطل وانت تنط من السور، شلون يعني؟
أنا مو مهم عندي يقولون عني خمبول، أنا أهم شي ما يقولون عني جبان.
- انزين وقالوا جبان يعني ويش صار؟
لا حبيبي، إذا قالوا عني جبان يعني راحت عليي، كل واحد بيجي وبيضربني عشان يراوي الناس إنه قوي، لكن إذا عرفوا إني شجاع ما راح يسوون فيي شي.
- انزين الحين إذا نطيت من السور هذا ما يعني بأنك ما بتنضرب من الشباب، يعني انت لازم تتشابق وية واحد وتغلبه وبعدين بيعرفون إنك قوي، أما إنك تنط السور فهذا ما يعني إنك بتغلب أي واحد تتشابق وياه.
صح كلامك، تدري أنا عندي فكرة.
- ويشو؟
شوف أحسن شي تخليني أتشابق وياك قدام الناس، وانت سو روحك ضعيف حدك، أنا ما بضربك عدل لكن إذا حسيت إن لصبيان بيشكون فينا إنا احنا نمثل يعني، احتمال اتحصل ليك سطار أو رفسة، بس صدقني سيدة بآمر ليك بيبسية بعدين.
- شكراً حبيبي، أنا لا أبغي بيبسي ولا أبغي سطار ورفسة، أحسن شي إنك تهرب في الهدة صراحة، الشباب إذا شافوك وانت راكب فوق السور على رغم أن الباب مفتوح بيقولون هذا عنده السور والباب واحد يعني واجد ماهر وجسمه مرن، يعني عادي ما يفتكر لو تشمخت ايده وطلع منها دم عشان يشكح السور. صدقني بيقولون عنك قوي، انزين أنا بقول عنك قوي أصلاً.
بس عجل اتفقنا. شوف في الهدة انت راقب السور وأنا بشكح، ويش قولك؟
- تمام
العدد 1471 - الجمعة 15 سبتمبر 2006م الموافق 21 شعبان 1427هـ
