تفاعل قراء "الوسط" بشكلٍ لافت مع الخبر الذي نشرته أمس الثلثاء (4 مارس/ آذار 2017) بشأن ارتفاع أسعار بعض المطاعم، وأثار الموضوع حفيظة الكثير من القراء.
وفي الوقت الذي تساءل العديد من القراء عن دور إدارة حماية المستهلك بوزارة الصناعة والتجارة تجاه هذا الوضع، أشار آخرون إلى أن ذلك يعتبر حرية شخصية وكل شخص مخيّر عمّا إذا كان يرغب بالشراء أم لا، وبإمكانه اختيار المطاعم التي تناسب وضعه المادي.
وتفاعلاً مع الموضوع، تداول عدد من المواطنين صورةً لقطع خبز مع الجبن، للمقارنة بين التي تُباع في "خبابيز" القرى بـ100 فلس، وبين التي تُباع في بعض المطاعم بدينارين ونصف، إذ قال أحد القراء "السالفة مو سالفة حسد بس من غير المعقول خبز وجبن يصير سعره دينارين ونص و لا لحم ما يجي ربع كيلو سعره عشرين دينار! كيف يعني ماخذ ذبيحه؟".
وقال أحد القراء: "أين دور حماية المستهلك في وزارة التجارة من هذه الأسعار الجنونية والغير معقولة - ولكن العتب على الناس اللي تقبل تكون مغفلة وهمتم المظاهر والتظاهر بالرقي فقط بالماديات وليس بالأخلاق وناسين كلام الله تعالى ورسوله - وناسين أيضاً أن القناعة كنز – أنتم من تصنعون من أصحاب هذه المحلات أفضل بشر للاستغلال - ربي يهدي الجميع".
وذكر آخر "للأسف هذا واقع الكثير الكثير من العوائل.. إسراف غير مبرر.. وصار أخذ الخردة عند البعض عيب الشيء بـ700 فلس يعطي الدينار ويمشي حتى عامل البلدية عودتونه على هالحركات.. القناعة كنز لا يفنى". وعلّق آخر: "خلنا من سالفة التباهي والتفاخر.. وين الرقابة عن هالمطاعم؟ وين حماية المستهلك؟ غياب الرقابة هو السبب"، وردّ عليه آخر: "محد قال ليك روح. وش دخل الرقابة في الموضوع. هي تثمن طباخها بهذا السعر. عموماً أكثر المطاعم اللي أسعارها مبالغ فيها مشحونة خليجيين وليس بحرينيين مع العلم أنك ما تحصل مكان أصلاً".
وكتبت إحدى القارئات: "المطعم له حرية وضع الأسعار والزبائن لهم حرية اختيار المطعم واختيار الوجبة التي تناسب ميزانيتهم. الاسراف والتبذير يعتبر أسراف وتبذير إذا كانت أموالك بسيطة وصرفتها مو في مكانها، بس اللي الله ناعم عليه ليش ينلام إذا عاش عيشة رفاهية؟ بعد الله خلق الناس مستويات وعلى فكرة المطعم يوم فتح المشروع كان التارقت ماله كستمر الطبقه العليا ومحد له حق يقول ليش الصحن بعشرين لو بخمسين لأن قبل لا تقعدون على الطاولة الأسعار واضحة، فالمنيو عينكم تشوف وتعرفون تقرون. شجعوا ولاد ديرتكم وبسكم غيرة وحسد".
وذكر آخر "لوما هالمغفلين جان ما تمادوا التجار، فالجشع آخر الشهر مر على المولات وشوف الزحمة أو في الانستقرام والسناب مثل صاحبنه يفوشرون بأكلهم وشربهم لو أنه تاجر والله ما خفض الأسعار وين إلى يصيحون ويقولون ماعدنه.. ما في وعي استهلاكي لو الناس تقاطع أصحاب الغلاء الفاحش جان ما زادت الأسعار، بس الناس ما توقف عن شراء اللي يحتاجونه واللي ما يحتاجونه". وأيّده آخر قائلاً: "نحن من رفع الأسعار لو كل واحد قاطع لما وصل بنا هذا الحال".
وأبدى أحد القراء رأيه قائلاً "لمن يسأل عن رقابة الجهات الرسمية على الأسعار الاقتصاد في البحرين حر، يعني بإمكان البائع أن يضع السعر الذي يرغب مهما كان مرتفعاً - مثلاً علبة المشروبات الغازية بدينارين - والمشتري له الخيار في أن يشتري منه أو من بائع آخر يبيع بسعر أقل. طبعاً يستثنى من ذلك السلع المدعومة مثل الخبز. والحل؟ على المستهلك أن يكون أكثر وعياً وأن يتجه لمن يبيع بأسعار معقولة لا ترهق المستهلك وتحقق هامش ربح معقول للبائع".
وذكر آخر: "حتى الچاي حليب، قبل محد يعطيه وجه ولا يشترونه، بس يوم صار اسمه كرك وسعره ثلاف ربيات وبعضهم يبيعه بخمس ربيات قاموا يشترونه ويشربونه ولا البعض يصوّر وياه سلفي"!.
والله انا من رايي يعني ان هذا الشي مبالغ فيه واايد حتى لو الواحد يحب الفشخرة والكشخه في اشياء افضل مو في الاكل وسالفه الاسعار الغالية انا يعني تو كان عيد ميلاد زوجتي رحنا دبي ورحنا تعشينا في فندق اتلانتس هو ليله في السنة عادي مافيها مشكلة وحتى الفندق بعد
لكن ادفع دينارين ونص على خبز جبن لا مستحيل عندي عقل لان
اخذ 25 واحد واوزعهم على مسجد اكسب فيهم اجر
وكل واحد حر بنفسة لكن ع الاقل شغلوا عقلكم شوي
بالنسبة إلى الخبز الطحين مدعوم. ولكن لعدم جود الرقابة والتفتيش ..قاموا الخبابيز بصغير العجينة. .مماجعلهم يستغلون الوضع لصالحهم
فمن الأجدى إغلاق أي خباز اذا كان عجينة الخبز ليست حسب المتعارف عليها
لو فرضنا انه تركت الحرية لرفع الاسعار وعلى المشتري ان يختار
لو اتخذ كل التجار رفع الااسعار فما الحل اين يذهب من لايستطيع الشراء
حدث العاقل بما يعقل
واتمنى عدم ترك امثال هالتجار وجشعهم يفعلون مايريدون من دون حسيب او رقيب
بدل ما تطبل على المطاعم .. تكلم عن فرض ضرائب على الكل و فرض رسوم إضافية و رفع البترول و الكهرباء و فرض رسوم بلدية و الى اخره من رسوم .. ترى لمن يرتفع السعر على موصل البضائع بيرفع السعر على المستورد و نفس الوكت المستورد على المستهلك الى هو مثلي و مثلك و المطاعم فالمطاعم تزيد اسعارها بسبب رفع التكاليف اللي تفرضها الحكومة عليهم .. المشكلة تحتاج حل جوهري .. اذا مطعم رفع سعرة بروح لغيره بس الحكومة مسؤولة عن تعديل احوال المواطنين
من راقب الناس مات هماً .. مستغرب من الناس اللي تراقب غيرها شنو يلبس و شنو ياكل و شلون يصرف فلوسه و بعدين يقول لك يبذر و ما يتصدق !! شدراك ما يتصدق عايش معاه انت و تلاقيهم اللي يكتبون ابخل منهم مافي و لا يتصدقون.
انا عندي صفرية قيمة من طباخ الغالية ام حسين
صار ليي ثلاثة اياام اكل منها
اللي يبي حياه رخيص وقوي هههههههه
شرط وياه ارويد بعد ههه
الريوق بيضه مفيوحه
الغدا روبه و خبز دبل
العشا قلاص لبن
وكان الله غفورا رحيما والحمدلله
انا ضد رفع الاسعار لكن الواحد مو مجبووور يروح هالاماكن يعني في الي اسعارهم معقوولة وفي شي اسمه البيت هو افضل مكان اقل تكلفة واضمن نضافة والطبخة الي تحبها بالطريقة الي تحبها مايحتاج تروح هالاماكن كل واحد يرف الشي الي يناسبه
الحمد لله على نعمة العقل خل برستيجكم ينفعكم
مع احترامي للجميع و لكن من الجميع يقارن بين الاماكن البسيطة و اماكن خمس و سبع نجوم. كل المناطق لها زبائنها. الفنادق العائلية لها زبائنها و فنادق النجمة لها زبائنها و فنادق السبع نجوم لها زبائنها. الأسعار اللتي يتحدث عنها المقال لا تزيد عن اسعار المطاعم الأخرى في المناطق الراقية و حتى مطاعم الفنادق الراقية. بالنسبة للمطعم الذكور يكفي عن تعرف ان من يعد طعامك طباخة بحرينية ماهرة عصامية. و ليس سردار كما هو في باقي المطاعم.
مايمدح السوق الى من ربح فيه يا عمي ..
شنو طباخة بحرينية الله يهداك ,,انت معقوله ريال كبير وعندك وعي وعقل تقول هالكلام ..
واخاف انه انت احد ملاك هده المطاعم ,,ولهادا يشملك المثل اللي كتبته فوق ..
انا مو مع المطاعم المبالغ بسعرها بس انت تفكيرك محدود
اذا انت مستواك سندويشات الرخوص ليش تروح تتغدى في الغالي؟ شغل مخك و مد رجولك على قد لحافك.
اترك عنك الحسد انت وياه .. اذا عندك مخ و ما تقدر على المكان لا تروحه غيرك عنده الامكانية ما اروح اسكر المحلات عشان انت ما تقدر عليه. امكانياتك تعيش في شقة ليش تأجر قصر ؟ هذا هو التفكير المحدود.
الحمد لله انا انسان مدلع نفسي واسافر الى امريكا والى عدة دول وحتى في البحرين اروح الى
المطاعم الفخمة وغير هادا وانا ماعندي ادنى شك انك ما شميت ريحه اي دولة غربية ...
انا معى الاقتصاد الحر وانفتاح السوق وانا لا اطالب بأن السلطات الرسمية تغلق هادا المطعم ولا غيرة
وسعرهم هم احرار فيه لاكن انا رسالتي للجمهور اللي يروح ليه والى غيرة
لاكن المقصد هو انه النعمة زوالة وانة انا شخصيا انضر نضرة شفقة الى المساكين
اللي ينضحك عليهم بمثل هده المطاعم .
نصيحة: أخي المواطن العالم يمر بأزمة اقتصادية بسبب انخفاض اسعار النفط و الدول الان تتوجه للتقشف من اجل تخفيف العجز لديها فلذلك يتوجب عليك مراعاة نفسك و محاولة الادخار للمستقبل حيث الظروف المالية منقلبة و قد تكون عرضة للازمات لا سمح الله
الفلس الابيض ينفع في اليوم الاسود
قيمه اللحم والهيل والزعفران وماي الورد والاجار وكل ذي يعني الي يبي يدفع حر في اكله اكو في مطاعم اتبيع ستيك اب ٧٠ دينار واكثر ومايوصل ١٠٠ جرام
في مطعم في دولة اجنبية يبيع صحن كباب مشوي باكثر من 2000 دولار هل يعني ان اقول ب 70 دينار رخيص و اركض اشتريه وشي ثاني التكلفة الحقيقية اقل بكثير جدا من سعر البيع و الربحية 50000%
الحرية احساس و ليست صرف على الفاضي
عذر اقبح من ذنب
لحم غزال بكم الكيلو؟؟؟
نشكر جريدة الوسط على تغطية المواضيع الحيوية و المعيشية و نتمنى من المسرفين و المبذرين مراجعة انفسهم و بذل يد العون و المساعدة للمحتاجين
النعمة زوالة و تحتاج اللي يحافظ عليها
يوم القيامة حساب للجميع
"و الذين في اموالهم حق معلوم للسائل و المحروم"
ناس ما تعطي الفقير ربية و مستعدين يصرفون الالوف على تفاهات لكن الله مو غافل عن الظالمين
اموالك مو لك بروحك و لا انت حر تلعب على كيفك في حقوق للفقراء و غيرهم
احسن من التجمع مع الاهل اسبوعيا كل اسبوع في بيت مع اشتراك الاهل في المصاريف والعمل هذا المفترض شغل نظيف ورخيص وتزاور اسبوعيا بعد 5 ايام او6 ايام عمل
بارك الله فيك هذا الكلام السنع صلة الرحم و تناول لقمة هنية وياهم
يا أخوان
لحد يقول لنا أنا معاشي 2000 شنو مشكلة لو أكلت خبز جبن ب 3 دينار.
يا أخي الناس لما ترتفع ميزانيتها تروح تاكل أكلات
راقية وغالية تناسب مستواها، مثلا كافيار، مثلا عسل جبلي خالص أصلي
لأن نفس سعر السلعة مرتفع وما يناسب إلا الناس إلي عندها مدخول قوي ومستواها يناسب هالصرف.
أما تقول لي معاشي 2000 بس أبي أكل خبز جبن ب 3 دينار، يا أخي هذا مو سلعة تناسب مستواك فمو مشكله
هذا انت تقول انا عندي فلوس وعادي أصير خروف
مافي صاحي يدفع 3000% قيمة اضافية لسلعة معينة ويقول فلوسي ويناسب مستواي!
تلنعمة زوالة
الإسراف محرم فى الإسلام ليش نخالف الإسلام وإذا واحد عنده فائض من المال عليه بالتصدق على الفقراء وهذا حق لقوله تعالى وفى أموالهم حق معلوم لساءل والمحروم
في ناس ما عندهم شعور يالفقير
يقول امير المؤمنين عليه السلام ما جاع فقير الا بما متع به الغني
الصراح أنا واحد مو مال مطاعم بس الشيء الملفت للنظر بأن أكثر اللي يروحون المطاعم الهاي يصور سلفي وسناب وانستقرام وغيره لماذا كل هذا
بسبب علشان الناس تشوفك وآخر الشهر أتطر من أبوك وامك بيزات .
اكثر يطرون آخر الشهر حتى لبترول السيارة
اللي مو قدها لا يرز روحه
ويش دخل حماية المستهلك انت حر ! اشتر من الأماكن المناسبه لك وخلاص !! الا لازم تروح المكان الفلاني ليش ،،،، عندك خباز سليم خباز الدالية مناسب للمتحججين وخل أبو دينارين ونصف للغير متحججين وسلامتكم ،،
من الرد شكلك تملك مطاعم خوك
يا أخي البني آدم مو حر في التبذير
تبذير بقرب لك معنى التبذير
التبذير يعني تصرف فلوس كثيرة لمنفعة قليلة
تضيع فلوسك في غير محلها
أما الإسراف فمعناه مختلف حسب ما يتناقل
المهم ما أطول عليك
التبذير حرام شرعاً، (( القرآن يوصينا .. (( ولا تبذر تبذيرا )) ))
والعقلاء يشوفون هالشي قبيح يا أخي
قبيح أني أدفع 8000 دينار مقابل كورولا 94 بس لأن عندي فلوس!
إي أخي عندك فلوس روح أشتر لك بي أم 2010 ب 8000 !
يا أخي السالفة مو سالفة عندي بيزات وكيفي
خل عندكم دين
وإذا لا
شوية عقل وتمييز بين الأمور
الحمد لله كل شيء في البيت من عشاء وغذاء وريوق وحلوه ومرة وحدة في الشهر نروح مطعم وي الاولاد وي الراتب بس هههههه ولله الحمد المرأة تقول كل شيء تمبي اسويه ترى يا بنات موجود في اليوتيوب والانستغرام وسناب وخل عنكم تصوير العشاء او الحلوه في المطعم خفي علينا ترى الي مسوي ليكم العشاء في المطعم واحد ما مسبح من شهر
الله يسعدكم
اللي عايش بس للاكل هذا اللي يدفع و ما يهتم
لكن التعبان في معاشه يحاسب للفلس عشان يمشي لاخر الشهر
البهيمة همها علفها
صحن كباب و تكة بدينار وياه بصل و انسى ما حصل
عجيبة المشويات الشعبية و رخووووووص
2 شاورما و 1 عصير بدينار و نص و انت مرتاح
اكيد اللي يعيش على قده يرتاح و يعيش بكرامة
مستحيل اروح لمثل هالمطاعم اتعب و اكرف من الصبح للمغرب و بجي واحد يصمني
اكيد اللي تعبان و شقيان ما يقط تعبه مني و الطريق على هرار
التقليد الاعمى مأساة حقيقية
يدفعون عشان تنافس و رياء
نحتاج لثقافة الاقتصاد و الاعتدال حتى الدول تتقشف عشان تحافظ على وجودها و استقرارها و في ناس ابدا الاي عنده كله يصرفه على هرار و اي ازمة تذله و يحتاج لفلان و علان
زميلي يقول يروح اخوه مطعم ريوق شعبي غالي عشان بس زوجته تطرش لربعها صورها و هي كاشخة و تبي تراويهم ان محد احسن منها
خلها تدفع من جيبها عشان تحس مو من ظهر الفقير
عندنا مدير اوروبي راتبه اكثر من 3 آلاف دينار كل يوم يجيب معاه ريوقه من البيت و الظهر غداه في البيت على طول و يقول ما في احلى من لمة الاعل على سفرة وحدة و الاكل من يد الزوجة الحنونة
اكيد العاقل ما يلعب بفلوسه عشان يقول نحن هنا
إنتوا خلو منكم هالخبر اللي فوق
يا ناس يا عالم في مطعم معروف حاط سعر "هريسة" بـ 7 دينار !!!
هريسة يا عالم بـ 7 دينار !!
أكيد اللي بجي يرد و يقول مو لازم اروح له .. و أكيد اللي بجي و يقول هذي حرية
لكن يا ناس في شي إسمه العقل ... ما في انسان عاقل يرضى بالهرج هذا
اتفق معك 100/100
هذا الواقع حبيبي مو مسالة قلنا وقالوا وجان على العقل والحساب والعقاب طالع الذنوب اي قدمنتشرة والناس لاهية يعني جت على فلوس بيقطها على اكل او شرب اكيد ما بيحاسب كيفهم كل واحد حر بروحه بالنهاية هو الي بيتحاسب مو احنه كل انسان بيتحاسب بقدر عمله وافعاله وفلوسه وين صرفها عشان جدي يقولون لك حرية شخصية وكيفنا كيفهم ويش نقدر نسوي احنه
زوجتي ما تحب تسوي شي في البيت معتمدة على المطاعم وش اسوي وياها شالخة الميزانية
صارحها بوضعك و حاول تساعدها في الطبخ عشان تنحل مشكلتكم
رجعها بيت ابوها و افتك من هذه الثغرة الخطيرة التي تطيح بميزانيتك.
و الله حالة و بلشة ادا قلت للناس غالي يقولون لك رزيل و ما تدفع يعني لازم يضحكون عليي عشان اعجبكم!
ما عليك من احد
اخم شي ترضي ربك و نفسك
عن نفسي انا ما افتكر في السعر واجد لاني احب اروح مطاعم كشخة ابي احافظ على برستيجي في المجتمع
تعرفون في زماننا المظهر واجد مهم و اللي الناس تشوفه كله كاشخ يحسبون ليه حساب غير
خوك دوام الحال من المحال
النعمة زوالة
خف علينا يا ابو لبرستيج ... ابو صروال وفانيله
الى زائر 125 انا البس وزار مو سروال و فانيلة ههههه
بعض الاسر يكون الزوجين موظفين فربما يحتاجون لشراء بعض الوجبات من المطاعم بسبب ضيق الوقت و لكن اختيار المطعم المناسب و الجيد الذي يناسب ميزانيتي مهم جدا
لان المفروض ان نعمل لمستقبل افضل لاسرنا و ليس لدفع فواتير المطاعم
في حالات خاصة تحتاج احيانا تشتري بس مع مراعاة السعر المناسب
الاكل من المطعم زين للتغيير بعض الاحيان و لا يكون عادة للتفاخر
المفروض وقت الضرورة الماسة
الحريم بس الله يهديهم لو يتركون السناب و المظاهر كان احنا يخير و محد ضحك علينا
المشكلة لما تطلع مع الحرمة و تقول لك ابي اروح مكان راقي لا اتفشل من البنات ربعي و لازم يعرفون اني مو اقل منهم في شي
من جديه الجشعين محصلين الفرصة للبوق
اللهم آمين
بلاوي و خراب بيوت من وسائل التواصل الالكتروني
في واحد صاحب مطعم يقول انا ارضى بريح قليل افيد و استفيد
و يقول خل الناس تشتري و تستانس على قد ميزاتيتهم و نحاول نراعي في الاسعار عشان الفقير يقدر يتنفس و يعيش
الله يكثر من امثاله
الله يكثر من امثاله
لما تروح مع زوجتك و تشوف الفاتورة المرتفعة و المقصوص عليك فيها تحسها تستانس على اساس انك زوج كريم و تدفع اي مبلغ عشان تسعدها
عادي يعني ادفع عشان تسعد الحاجية
النسوان واجد سحبو المظاهر لو مو هم كان المحلات بندت من زمان
الرجال ياكل طعمية و بشرب قوطي عصير و خلاص
الله يهدي حريمنا
المشكله في الناس الى تروح مثل هاذي مطاعم
لو كل الناس تقاطعهم حان سكرو محلهم
في ناس تحب اللي يضحك عليهم باسم مكان راقي مع ان الاكل اقل من عادي
تدري ليش يروحون لانه يبون صور حلوة للسناب و محل السمبوسة اللي صوب بيتهم ما يصلح ديكوره قديم
لكن آخر الشهر تلقاه يتسلف من الخباز و البرادة هههه
شباب لازم نروح نشتري خبز الجبن البحريني الطازج بايدي بحرينية حريرية ناعمة و معقمة كل هذا فقط ب 2 ونص دينار يا بلاش
و تحط صورتك في السناب مع الفاتورة عشان تفوشر و تسوي روحك شخص راقي
نعم نعم تقدم و احنا وراك عشان نراوي الناس ان تحنا عيال عز نشتري خبز ب 2 و نص دينار و لا نفتكر كلش عادي
يا عيني على الحرير لا يصيده غبار
عنبووه ذهب حشى مو نتيفة خبز محروق بعد
وكلوا واشربوا ولا تسرفوا إنه لا يحب المسرفين
اعتقد بان الآية القرآنية واضحة.. وبصراحة لو يصير راتبي 20000 ما بشتري طبق رز بعشرين دينار يعني 100 دينار لخمسة أشخاص لوجبة واحدة فقط؟؟!!..ليش الترف الزايد؟؟!! هذا إسراف وتبذير واضح خاصة إذا تكرر أكثر من مرة في الأسبوع .. اتقوا الله فهناك ناس مو لاقية تاكل!!
احسنت و لكن تتوقع في احد راح يستمع لنصيحتك؟؟
الكل يلي يقول الزود عندي و يزمط بروحه
اعرف ناس تتسلف عشان المطاعم و الفشار ههههه
انا شخص احب المطاعم البسيطة اروح مع الربع ناكل و نتلذذ مشويات و مقبلات و عصيرات ما يكلف الاحد اكثر من 2 دينار و خوش اكل
لان احنا نبي نستانس نقعد مع بعض و ما يهمنا المظاهر و الفشار
و السناب اللي عندي اصور فيه بس القطاوة اللي ياكلون بقايا اكلنا
هههههههههههه
انا مثلك حبوب استانس مع الربع و جيينا مرتاح
بلا فشار و بلا نفخة و هرار
عارفين للوناسة هههههه
أفضل شيء أكل البيت وبس بدون نقاش
ليش التبذير والإسراف والفشار
انت صح
ادا الزوجة تحب تتعاون مع الزوج اكيد يرتاحون في اكل البيت
لانه حلال نظيف طازج مطبوخ بعناية و يناسب الميزانية
المطعم ولو انه يعتبر استغلالي وطماع الشره موعليه.. الشره على الا يروح ياكل ويدفع ليهم هالاسعار المبالغة.. حتى لو انت بخير عندك فلوس تحمل بفلوسك باجر بتنسال عنها ووين صرفته.. بدول ماتاخذ عيش ولحم ب20 خذ لك ب3 دينار من افضل المطاعم الا ماتستغل الزبون وال17 دينار الباقية تصدق فيهم.. هال17 دينار تغدي لك 4 عوائل محتاجة.
و يمكن يفلس و يتحسر على اللعبة مال ايام زمان هههه
مستحيل اتصدق ابي اكشخ و استانس انت كيفك وي الفقارة
الله يحفظ ام العيال ما تقصر تطبخ بالبيت و اكلها حلو بس بعض الاحيان نغير و نشتري من برة و يكون مضمون حلال لذيذ و سعره مناسب جدا للميزانية
و اللي يعرف يتصرف عدل و بدون فشار يستانس و يرتاح و يعيش بدون سلف و صياح
الله يوفقكم
اروح مطعم فاست فود و آكل وجبة كشخة و ما تكلف وايد احسن لي من البوايقة
ممتاز و هالايام اشوف عروض واجد في اغلب الفاست فود
نظافة و لذيذ و رخيص
انا صراحه عن نفسي والله العظيم ما احب ارح محل مطعم غريب وديكوره معدل .. لانه اعرف اني بنقصب واذا بيوم رحت مجبور ويه الشباب واشوفهم يفتحون الباب ويعدلون الكراسي وشويه يجيبون القفشات والفلفل والكلينكس اخاف ههه يصيدني قلق ما احب احد يعدل شئً لانه اعرف محسوب كل شئ لو اكل واقف ولا احد يجد يعدل ويبتسم حته الابتسامه ما نبيها بالنهايه خلنا على الطعميه ولجبود ابرك لنا ونسد الجوع
نعم
القناعة كنز لا يفنى
المظاهر خادعة
للاسف اصبح صاحب المشاريع البحريني استغلالي جدا
العامل الاجنبي يسوي لك نفس الشغل باقل من نص السعر و طبيعي بكون خياري الاول
صحيح نحب ندعم البحريني بس هو بعد يراعي الله فينا
اقنع بربح قليل و الله يبارك مو احسن من تبند بسبب الجشع
هذا واقع الحال
حتى اذا تروح ورشة او كراج تشوف دائما الاسعار فوق مع ان الاجنبي عنده مصاريف وايد بس اسعاره ارخص
في النهاية الكل يبي السعر المناسب
وش استفيد من بحريني يقص عليي
بس خوك في بحرينيين قنوعين و يرضون بريح قليل
الناس مو كلهم جشعين
انا كل سبوع آخد مجبوس هامور ل 4 انفار ب 6 دنانير من مطعم لذيذ و يستاهل سعره
عوافي رخيص و قوي
انا بصراحة اشتري من المطاعم بعض الاحيان للتغيير مع العائلة و مرة في الشهر او الشهرين و الحمد لله نستانس باكل عجيب و خدمة زينة و احنا 4 انفار ما يزيد عن 20 دينار
معروفة طبعا المطاعم العائلية الزينة
انا ما اسوي دعاية بس اتكلم عن تجربة زينة
عدل مرة في الشهر عادي و 20 دينار في الشهر مقدور عليها ... موفق الله يسعدكم
في ليلة الجمعة الماضية رحت مع صديق مطعم تكة و كباب شعبي خوش و قعدنا ننطر نص ساعة عشان نحصل طاولة فاضية و بعد ما اكلنا لين قلنا بس طلع كل الطلبات ب 4 دنانير لشخصين
صراحة عرفت ليش ما في مكان فاضي
حبيبي طبيعي الناس تبي الرخيص القوي
لا تستغرب
في خباز في القفول يسوي خبز عجيب و على نكهات واجد و رخيص و قوي
مرة شريت خبز جبن شيدؤ سبيشل ب 3 ربيات لكن لذيذ حده
عرفته
خبزه واجد زين و على كيف كيفك
بصراحة في مطاعم عيوش ممتازة و ما يكلف النفر اكثر من 2 دينار لطبق اللحم و بعضهم لحم عربي ممتاز حده ب 3 دينار و نص
هذي اللي تستحق الدعم و التعامل معاها
دام اسعارهم زينة يستاهلون تشتري من عندهم
احباب قلبي
من تدخل مطعم و تشوف سفتحون لك الباب و يعدلون كرسي الطاولة و شوية ديكور اعرف انه اكيد راح يشق جيبك وقت الدفع
عادة هذا اللي اشوفه
نعم
يبون يطلون كل شي من كبد الزبون هههههههه
صديقي يروح فندق 5 نجوم و بوفيه راقي مطل على بركة السباحة و اطباق كشخة حدها بحدود 14 دينار بوفيه الشخص الواحد
في فندق بوفيه بحري كشخة ب 10 دنانير فقط
طبق لحم و عيش ب 20 دينار!!!!!
في مطاعم بوفيه ممتازة ب 4 او 5 دنانير في جدعلي انا رحت بعض المرات مع صديقي و اكلهم زين و تنوع
رخيص و قوي
زين تسوي 4 دينر بوفيه واجد زين
الاكل من المطاعم مو شي ضروري قاطعوا خلوا يخيس و تشوفون شلون تنزل الاسعار و فوقها طبق مجاني بعد
صحيح بس نبي شوي نتدلع و نصور سنابات للربع
اليحريني من يسوي مشروع يفكر روحه معجزة العصر و كأنع نازل من الجنة يبي يقص عليك في الاسعار
اروح مطعم اجنبي محترم و سعره زين بعد احسن ليي
الحمد لله نروح مطاعم شعبية مشويات و حمص و عصير بارخص الاسعار و الخدمة 100/100 و هي موجودة بكثرة
هذي المطاعم يجب اغلاقها
لكي يشجع المطاعم الأخرى على رفع الأسعار
ما يحتاج اغلاقها رسمي
المقاطعة تخليه يبد من نفسه عشان يعرف قدره و ان الناس مو مغفلين
في فرق بين الحرية الشخصية و "إستغفال الناس", على شنو خبز وجبن بدينارين ونص؟ او طبق هريس نتفه ب 9 دينار؟ هالمطعم مبالغ في اسعاره جداً .. واتمنى يكون في رقابة في البحرين على هالنوع من المحلات. الناس اصبحت مرغمة تدفع اسعار مبالغ فيها في اغلب المطاعم رغم قلة الكمية, لسبب وحيد وهو ان "الناس كلها تروح هالمطاعم". حسب تجربتي الشخصية, اغلب المطاعم فالبحرين ينضرب فيها المثل واذا تروح تدفع حوالي 20 دينار لوجبة شخصين وفي الأخير لا طعم ولا مذاق ولا خدمة مرضية. أين الرقابة؟
اختيارك الغلط لازم تتحمله
وش حادك
كثير من المطاعم قائمة الطلب لايوجد بها الاسعار وهذا دليل على التلاعب بين فتره وفتره في الاسعار
صحيح تلاعب واضح و لكن تقدر تسأل و تاخذ فكرة قبل الطلب
لا تخجل من حقك اخي
يجب فرض تقديم قاءمة الطعام للزبون قبل اي طلب.
كلهم يقدمون قائمة عيل شلون تطلب و تعرف الموجود بس تحتاج استفسار عن الاسعار
اسأ ل قبل ان تطلب من حقك خلي يقولو الي يقولو
المحل اسعاره معروفة و لكن ناس تدفع للفشار في السناب و بعدين يعورون راسنا بصياحهم
مفاليس و مفوشرية
هناك مبالغة بالاسعار و صح أين الرقابة على هل أماكن ، و كذلك يوجد بعض أماكن بها خدمات مقابل سعر زياده و مقاهي تشهد
ما يحتاج رقابة حكومية
يحتاج رقابة شخصية = خله يولي ما اشتري منه
ترى في ناس تحب الفشخره حتى لو يحصلون نفس الاكل أرخص في مطعم غير مايبونه يحسون هذي المطعم مب في مستواهم ويحبون اللي امشلخ ظهورهم حق التصوير بس
يستاهلون
بس لا يصيحون و يعورون راسنا
الى صاحب المطعم العزيز: ممكن تعلمني شلون تقدر تبيع شي باضعاف سعره و الشراية تدفع؟!!
حبيت ادرس التجارة و فن البيع عندكم
بكم الدورة الدراسية و متى تبتدي؟؟
مواطن محتاج تطوير المستوى المالي
سجلني وياك خوك ترى الصيد زين هالايام
نبيع على المفوشرية و نترس البوك بيزات
الله يزيد من الدفيعة
لازم في رقابة - والا اذا كان العذر في صف المطاعم فباقي المطاعم بيحذون لنفس السبب و يصير الكل رافع سعرة - و هذا الفحش جزء من الفسدة - و طبقوها مثل الحرية الشخصية في اللبس و غيرة - بل الاكل اشد ضرر - كلشي لازم له ضوابط .......
قاطع و فك روحك
ادا ما عدل سعره خله يبند
بصراحة انا اشهد بذكاء المحل اللي يقدر يبيع شي غالي و الكل يعرف انه ما يسوى شي
عبقري مو بس ذكي
شلون يقدر يبيع ب 25 ضعف السعر الاصلي
هذا نابغة هذا مدرسة تسويق و تجارة
هذا اللي يحل ازمات العالم الاقتصادية
لا ذكاء ولا شي لا تبالغون هذا الةضع العام في كل الدول مو بس هني يعني هالذكاء جاي من اماكن اخرى وتراكمات يعني لو ما كان الوضع لجميع المطاعم والفنادق جدي تتوقع بيقدر يبيع هالخبزة باكثر من دينار مو بعد دينارين بس لان الوضع العام صار جدي هو استغلال فرص فقط الي عنده فلوس عرف وين يحطها ويستغلها الله يوفقهم سواءا غالي والا رخيص
انا ما اؤيد هالاسعار عشان جدي مااروح لمكان غالي كثير بالنهاية هادي فلوسك انت تعبان عليها انت المفروض الي تعرف وين تقطها مو اطالب المطعم يخفض او يسكر
لازم نقاطع هالمطاعم
المفروض
انا ما اشتري شي الا ادا دورت زين و عرفت ان السعر معقول و اللحوم حلال و نظيف
صاحب المحل مو غلطان بالعكس ذكي و شاطر لانه قعد يبيع شي ب 25 ضعف سعره الحقيقي
الغلطان المشتري و محد ضربه على ايده
ادا مو قدها لا يروح مكان اكبر منه
ترى ناس وايد يدفعون للفشار و مستانسين حدهم
صحيح كلامك
صاحب المحل ذكي و قدر يقص على المغفلين و ياخذ فلوسهم و هم يضحكون
بصراحة عجبني و ابي اتعلم التجارة مثله
ديرة سايبة!!!
قصدك في ناس تلعب بفلوسها و ما تعرف تتصرف بها و في فقارة مو لاقية اللقمة
ناس في فشار و ناس في مجاعة
من جديه ما نتوفق و نتطور
ما نساعد المحتاج لكن ندفع حق الزمط و الفشار
العتب على ابو نفخة اللي يشتري
النفخة بجي يوم تنبط فيه وتختفي يا بو نفخة
محد قايل ليكم تشترون شي مبالغ في سعره روح الخباز بربية وش حلاوته
لازم النفخة و الفشار و كم يوم و تصيح من الافلاس
ما يضر شويه فشار عادي نطلع فيها ههههع
حبيبي الكشخة حليوة حتى لو بالسلف و الديون بس على الاقل تحسس روحك انك عايش
و ادا ما قدرت تدفع سجن كم شهر و تطلع هههه
احنا السبب من اللي يدفع و يقبل هو اللي يتحمل!!!!
انا ما اخلي احد يبوقني و انا مغمض اروح الخباز بربية خبز جبن بحريني طازح مع السمسم من التنور و بربية نخي و بربية شاي كرك كلها 3 ربيات و احلى ريوق بين ايديك
20 دينار تغدي 20 شخص من المطابخ المحترمة
حتى بارخص موجود
في المطاعم الراقية ما يزيد سعر طبق اللحم عن 3 او 4 دنانير شلون ب 20 وين صارت؟؟؟؟
صارت عند البوايقة
سرقة برضا المغفل االي يتعامل وياهم بسبب مظاهر كاذبة و مفوشر
كله حق السناب و الانتغرام هههههه
حشى جاي من الجنة
يمكن ملائكة تسويه
قاطعوا الجشعين و راح يتأدبون
تحتاج فقط خطوة جادة و بصوتك تقدر
لو لا الناس اللي تشتري كان ما قدر يمشي شغله
نفص الوعي و الثقافة عند المستهلك هي السبب
ما الداعي لشراء سلعة و انا اعرف انها لا تستحق ثمنها
صحيح ناس تفوشر على اساس الفاتورة قيمتها فوق
سبب غلاءاسعارالمطاعم اﻻجارات
ودي اصدق بس قوية قوية
من يشهد للعروس غير امها ههههههه
ما يمدح السوق الى من ربح فيه ..
الناس اللي تقبل هذي الاسعار و تتعامل مع الجشعين هم السبب في استمرار غلاء الاسعار و التشجيع لهم على الاستغلال و الاستغفال
التجارة تحتاج زبائن (المشترين) و القصد اعتقد واضح
كلامك صحيح المشتري هو السبب في استمرار و نجاح السلعة
فيجب ان يفرض المشتري سعره و ليس التاجر
بدون المشتري السلعة لا قيمة لها