واحد من مدرسة الرفاع

قبل امتحان الانجليزي كنت متفائل جدا لاني كنت رايح تقوية وفي التقوية عطونة تقريبا ستة رايتينغ انه حفظتهم عدل ذاك اليوم وكان فيه رايتينغ كتابة رسالة حق صديق من خارج البلد يبي يزورك بالعطلة، وفي وقت الامتحان طالعت الراينيغ واحد دارسة انه والثاني مادري من وين يايبينة قريت السؤال مكتوب عكس الي انه درستة اكتب رسالة حق صديق من دولة تتمنى ان تزورها في العطلة.ليش يعكسونة يعني هاي يعتبر رايتنغ من خارج المنهج.

صعب ثم صعب

الوزارة لا تراعي المستويات الطالب في الانج تعطي امتحانات وبس

نووووووووووو تعليق

الله اكون ف عون اولادنه وبس

... حرام ؟؟؟

الامتحان صعببببببببببببب مو دلاعه
انتينه ما قدمتينه عشان اتقولين مصاخة

صراحة من الخوف اللي فينا و الارتباك اللي صادنبا بعد الرايتنج هذا أثر على بقايا الأسئلة
عن نفسي : من خوفي عفست حتى في الاسئلة الثانية

أمنيتي ايب ممتاز بس وين ؟؟

يعني انه شباقول شباخلي ! بقول من الملعمات ولا الوزارة ولا المناهج اليديده المأساه الي حاطينها !! ولا من لمتحانات الي تكون خارج طاقتنا ولله شكلى مابنخلص امتحانات اله احنى في القبر !! من حرقه القلب ولله, وامنية امي وابوي بالممتاز صارت مستحيلة اذا كان الوضع جذي!
ولله يكون بالعون ...

طالب ثانوي

الامتحانات كلها امصعبة ...
وجذي بينزل معدلنا .. المفروض يدءبون لرفع معدل الطالب لا خفضه..

لكن ما اقول الا الله يستر

منبطه جبدي

جان زين بس الانجليزي حتى الاكاونت جارو عليه جابو لينه امتحان من مادري وينه الي بالصفحه الرابعه دورو راسنه الله يدور راسهم والله مو حاله !!!
و الانجليزي لو ما جت المعلمة و فصفصت لينه الكلمات جان والله بطلع واني ضامنه الرسوب و الحين ما بفيدني الا الرايتينغ بس هذا غير التصحيح الحليو الي كانه مشخااال يتحتحون درجاتنه ابه والله مو حاله لاعت اجبوودنه طول السنه ندرس و نلفح اخر شي يجيبون لينه مدرسين مصريين يحطون الامتحان لينه و المدرسين الي يدرسونه نص الفصل غايبين في بلدهم مصر

الله يقويكم طلاب وطالبات

الصراحة في بعض امتحانات الوزارة يجيبونها من الكواكب هي صدق صعبة بس اذا واحد يدرس اكثر من الي موجود في الكتاب يمكن يحل زين

آآه بس

اني ماخذتنه تحسين والله خايفه ارسب في مقرر انج 201
الامتحان خياااااااااااالي .. اني ماخذتنه حتى احسن الدرجه شبسوي اذا عدت المقرر مااتخرج يعني !! لاااااااااا والله خايفه صاي همي الوحيد والله
اهئ اهئ اهئ
.. توجيهي..

حراااام

شنو هذا ظلم احنا حتى التعديل ماوصلنا من المسؤول عن ضياع درجاتنا وزارة فاشلة

اه عليكي ياوزارة

لعلمكم الى في الوزارة يستانسون اذا الامتحانات صعبة وتصدقون حتي لو تعطون الى وضع الاسئلة الى ماادري من وين جايبها أو الوزير أو المدرسين هذا الامتحان يرسبون
طبعا هما مو خايفين على معدلات اولادهم لان بيحصولون بعثات، وفي مدارس يجمعون المتجنسين في صف واحد ويخلون مدرسين مرتزقه يدرسونهم وهم في الغالب يضعون الامتحانات "اللبيب بالاشارة يفهم"

فعلا

الامتحااان كان فيه اخطااء ماجت الاخطاء الا متى؟؟ يوم حلينا؟؟ ثانينا يا زائر رقم 1 ,, احنا شطار ,, وعلاماتنا كامله ,, تجي انت تقول دلع ؟؟تكلم عن نفسك يا خبير زمانك ,, الزائر رقم 12 ,, فعلا ,, الخلل مو فينا ؟؟ الخلل فيه؟! والله في احد يجيب ريدنق جدي؟لو في احد يجيب امتحان تحدي ويه الطالب؟؟ لو يحط لينا مدرسه مصريه ما نفهم ليها الا كلمه ايه ده ,, انتوا ما بتفهموش؟؟
الزائر 16 فعلا ونطاالب بإعااده الامتحان وتسهيله ,, عليكم الله يا وزاره التربيه ,, رفقا ايتها الوزاره بقلوب انهكتها مقرراتكم

...

مشالله عيوني عليكم بارده... صدك فاشلين ........

اتقو الله بالطلبة

الله يعينكم حبايبي
بصراحة الضغط والحشو المكثف غير منصف للطلبة ودي افهم ليش الحشو والتصعيب بالامتحانات خلو الطالب يستخدم قدراته ويطلع من الامتحان فرحان
ودي افهم شنو بيستفيد الطالب من هالحشو ومتجاهلين عبقرية ومهارة الطالب خوش وزارة

بعد 3 امتحانات... طلبة الثانوية يتذمرون

احنا قدمنا انج 215 التوجيهي التجاري كاااان سهل بالنسبه لي عقب طلعت من الامتحان كان عندي انج 201 مباشره فتره 2 ماخذته تحسين صج صج كان صععععب صععععععب الامتحان كلش ما سويت زين حتى الرسوب اتوقع ارسب
الحين انه ماخذته عشان ارفع المعدل والله يستر جان ما اعيده زين
وزائر رقم 1 انت ما قدمة الامتحان ولا تدري او حتى لو قدمته يعني انت يمكن اوكي في الانج غيرك لا فلا تقعد تتحجى بشكل عام ناس وايد وايد عندهم ضعف في هالماده بالذات

انصفوا طلبةنظام التعليم الفني والمهني

نحن طلبة السنة اولى في النظام السابق الذكر تفاجأنا بامتحان مادة العلوم ( علم 702 ) ان هناك كثير من الأسئلة غير موجودة في المقرر ولم يتم شرحها ونناشد مدير مدرسة الشيخ عبدالله الأستاذ مجدي بكري في النظر ألى أمرنا وخصوصا ونحن حاولنا القاء به دون جدوى لمناقشة هذه المشكلة
وكلنا امل ان ينظر لنا هذا الأب بنظرة تشفي صدورن كي لا يتأثر معدلنا

حقنا ضايع ويا هالوزارة الفااشله

وين احساسهم يروح لما يحطون لينه هالأسئله !! ماعندهم ضمير يعني حسبالهم عباقرة زمانه احناا زين منه نحفظ ونحل مو بعد من عندهم ومادري شنوو وياريت يعطونه وقت نفكر فييه بعد !
ماقول الا ماالت وطيح الله حظ الي يصححون ماعندهم رأفه كلـــش ,,
منهج فااشل نفس وجووهم ,, والي بيتفلسف لايجي يتفلسف عليينه ولد مييري

لآـآ تعليق يليق ...!!

بصرآحة الوزآرة مآتعرف شي اسمه مرآعآة الطآلب ... كل اللي تعرفه تحط امتحانات وهو عليه يجيب الدرجة .. بالله من وين ننجح وهم مو حابين لنا هالشي ..!! مفكرين روحهم في بريطاينا وجايبين لنا امتحان انجليزي اسألته من السمآ ..!! وين صارت ذي .. خل يصعبون بالحد المعقول مو لدرجة ان احنا نطلع من الآمتحان نصيح ومتأكدين من الرسووووووووب ... عمر الوزآرة ماسوت شي صح ... في كل شي فااااشلين // نبي نعيد الآمتحاااان

اللي يقدم يحس واللي مايدري يسكت!!!

انج 201 اصعب امتحان بصراااحة الخللل من اللي يحط الامنتحان مو من الطلبة اذا مستوى الطلبة مايسمح حق امتحانات بهذي الصعوبة المروض يحطون امتحان وسط لا سهل واايد ولاا صعب اني حليت الامتحان ولا ضامنه اجابة صح !!! ولاا تالي بقولون نسبة الرسوي مرتفعه !! والله حالة

الامتحانات كل ما لها تصعب وتصعب

ليش جدددي عااد لامتحانات كل ما يجي ليها تصعب كل امتحان يقول الزود عندي ,, ارحموناا شووي احنا بشر قدروا شووي
امتحانات صعبه ومعلماات خرطي كل وحده شرحها ماشالله احلى من الثانيه
يتاخرون في الشرح ولين جا نهايه الفصل يقعدون يضغطوون علينا ووويش دا وبعدين يقولون الخطأ مناا
ياوزاره التربيه والتعليم ارحمينا عااد
.:. معانات طالبه ثنويه .:.

جامعيهـ

اه ه حرقة القلب لـ امتحان ريض 313 التفاضل الا عطونا اياه لا زالت

العيب فيك يـآ وزير التربية .. آلله يـآحذ حقنا منك ~

العيب مو في الكتاب و لا في المدرس .. العيب فيك يا وزير التربية و التعليم .. الحين الامتحان يجي عشان يختبر قدرات الطالب ؟ لو عشان يطيح درجااته ؟
الاختبار المفروض يكون في المنهج .. مو يجيبون لينا من جيسهم .. يعني وش فيها لو جابوا لينا امتحان عدل نفس الناس و العالم ؟
امي و ابوي يقولون على ايام حضرة الوزير المحترم / أ . محمد علي فخرو .. الامتحانات صعبة بس الي فيها كله من المنهج ما يجيبون ليهم من برا ..
الله علييك يـآ وزير التربية ..
للنار و بئس القرار ..

أصعب امتحانات

أي نعم , الإمتحانات كانت صعبة مقارنةً بالسنوات السابقة .
الإنج كان امتحان صعب اما مقرر الفيز 211 كانت هناك اسئلة من خارج المنهج و مسائل لم ندرسها كما هو الحال في مقرر الأيض و الإتزان
نرجوا المرونة في التصحيح

بعد 3 امتحانات... طلبة الثانوية يتذمرون

السبب يا أخواني وخواتي ليس في منهج الغة الانجليزية انما في المدرس الذي يدرس اللغة أحنه نجلس وننتبه الى المدرس وفي النهاية لا نستفيد منه الا القليل واقصد هنا المصرين والتونسين أما البحريني فنستفيد منه الكثير لنه يوضح المعنى بشكل أفضل

الى الزائر رقم 1 !!!!!!!!!!!!!!!!

ياولد ميري لا تقعد تفلسف وايد اصابع ايدك مو سوى الناس قدرات والناس قاعدة تتعب وجد وتجنهد وتعبانه حيل وتعب اعصاب وسهر والله يكسرون الخاطر وانت جاي اتحط على هالفقارة روح جوف المعاهد الي غاصة باالناس اتقول سوق المقاصيص هذا على شان شنو ما قول الى الله يكون في عونهم ويوفقهم الى اعلى الدرجات ويجعل العسير يسير والنجاح حليفهم وعساه تعبة مخلوفة ياكريم .

عساه علة وزارة التربية والتعليم

أرفع شكوتي الى كل من ساهم في وضع الامتحانات الله يأخد الحق منكم ان شاء الله وخاصة اول ثانوي امتحان الدين كان صعب وليش بعد الي اخدنه في المنتصف بعد تحطوونه ويه النهائي وش هالاحساس الي فيكم جاااااااامد ماعندكم احساس الله ياخد الحق منكم مصيركم النار ان شاء الله وبعد على هالتصحيح الي تصححونها مثل اوجوهكم الله يأخد الحق منكم ان شاء الله بحق هذا الشهر يااااااارب ::::طالبة الثانويه::::

المجهول

بالنسبة لاختبار الانج فيه كلمات كثيرة مو مفهومة والي صعبه زيادة الاخطاء في الاسئلة واهمها سؤال الرايتنج رقم(1) وهو اجباري بالنسبة الى كلمة Municipal وهي تعني البلدي كثير من الطلبة كتبو الرايتنج اعتمادا على هذي الكلمة وفي اخير الوقت ايجي تعديل من الوزارة ويغيرون الكلمة الى Municipality وهي تعني البلدية ووقت الامتحان ساعتين والامتحان طويل يعني انحس مافي مراعاة من الوزارة،،

الى زائر 1

اذا انت حليت الامتحان بعدين تعال اتكلم لان احنا الى درسنه والامتحان انج 201 كان صعب واحنا مو الاولاد ميري علشان انكون فيلسوفين في الانج وما فيه وقت
والناس قدرات ناس اوكي في الانج وناس ما تفهم فيه فلا تتكلم قبل ما تشوف الوضع

اتمنى كل التوفيق والنجاح

اتمنى كل التوفيق والنجاح وتخطي العقبات لكل الطلبة والطالبات وتحقيقهم النجاح باءذن الله

طالب ثانوي

اولا الى الزائر رقم (1) تقول اانه الدلع زايد والطلبة ميحبون هل مادة بس لو انت كنت محلنا شان حسيت بلي ايصير خصوصا اختبار انج 201 وكان اخطاء في الاسئلة والوقت مايسمح لهذه الاخطاء خصوصا ان الاختبار طويل ومصعب من ناحية ثانية يعني اذا الوزارة مصرة على تنزيل معدل الطالب هذا شي لو الخلل في المدرسين ،،، وحنة عندنا في مدرستنا مو بس امتحان الانج حتى امتحان فيز 211 الا هو الموجات الطلبة زفتو فيه واسئلة اول مرة اشوفها انه بس الله يعلم من الاساتذة الي درسونا لو من الي وضع الامتحان

تنبيه

بصراحة المناهج كل ماليها تصعب
صحيح ان المخ يتطور مع التطورالحاصل
بس اشوي اشوي مو جنا في سباق إللي يلحق يلحق وإللي ما يلحق يلحق امه
وخصاصا منهج الانجلينزي بتي في الرابع ويعطونها انجلينزي مال جامعة ويش هالحالة

تنبيه

بصراحة المناهج كل ماليها تصعب
صحيح ان المخ يتطور مع التطورالحاصل
بس اشوي اشوي مو جنا في سباق إللي يلحق يلحق وإللي ما يلحق يلحق امه
وخصاصا منهج الانجلينزي بتي في الرابع ويعطونها انجلينزي مال جامعة ويش هالحالة

الى زائر 1

اختي أو اخويي .. ماقدمت الامتحان انته ولا تدري نسبة الصعوبة ... ولا تدري أي قد الحرة الا تصيدك اذا طول الفصل تتعب وتجتهد وفي الاخير .. اييبون لينا امتحاااااناات مو طبيعية .. امتحااان انج 201 .. كان خيالي صراحة .. اول مرة اجوف امتحان بهذي الصعوبة ... واخوي احنا ماندلع . ليش الدلع اصلاً .. احنا خايفين على معدلاتنه تنزل اذا ظلوو يعطونه امتحانااات صعبة .. في الاخير احنا المضررين ..

بنات الاعدادي بعد محتجين

الابتدائي و صفوف اول و ثاني اعدادي في مادة الدين مايدخلون معاهم دروس قبل المنتصف بس ثالث الوحيدين همالي دخل معاهم ومع الادلة والاحاديث القرانية حرام عليهم ندرس17 درس في عصرية وحدة موحاطين لي جمعة وسبت وحنا انكمل اخر ناس والابتداي قبلنا
حرام عليهم

شهالدلع الزايد؟

اصلا الطلبة ما يحبون المادة وما عندهم قابلية او حب لتعلم اللغة, وبعدين انجليزي مب صعب حق إلي فعلا يدرس ويتعب روحه! والمدرسة تعلمك مبادئ اللغة والباقي عليك..مافيه شي هالكثر صعبة تكتبون رسالة بالانجليزي يعني؟ عيل فالجامعة شبتسوون؟ كل موادكم بالانجليزي والمحاضرات بالانجليزي..يعني إلي يعرفون اللغة احسن منكم ولا مخهم غير؟ الله يهديكم بس..