أرخ المرحوم الملا عطية بن علي الجمري كيف كانت البحرين أيام «بطاقة التموين» وذلك في العام 1362هـ الموافق 1943م.
بسمك إله العرش باري البشر
سلم على المختار سيد مضر
بعض الاحباب اقسم عليه قسم
اذكر بعض حال الزمان ابنظم
قلت القلب مليان هم وهظم
لكن اسلي القلب عن هالقهر
ظليت ادير افكاري او منتكي
واشوف حال الخلق ما نحكي
والزين منا الحالته ينبكي
من شاف هالحاله ابطول الدهر
كل الخلق هالحال ما شافته
حتلا التمر ضموه ملاكته
واهل الضعف يسلام ما ضاقته
ما تخبروني وين راح التمر
اتمور ابمخازن واسعه امروضه
واحنا الامر للخالق انفوضه
والمنع جاها وحل عليها القضا
بالمستشار وطلع منه الامر
كامن يبيعه ايزود لو يشتري
يصبح امعاقب ينحسب محتري
واللي قبل ما باع يجرع شري
ولحد يشيله امن الخشب للبحر
أفعالكم يهل التمر جايده
ابثلثين ما ترضون بالفايده
بالسعر عدكم مصلحة زايدة
وقاطين سويتوه خفيه السعر
مدري اشعدكم من ظنون وامل
با الله اتركوا عنكم خسيس العمل
قل التمر بالناس شوفوا اشفعل
شالعذر عند الله ابيوم الحشر
مات الفقير ابجوع وين الشيم
وين الديانات ورجال الكرم
معلوم يرباب العلى والعلم
صاحب الرحمه اينال طول العمر
شوف الاسعاف اللي نما وانجمع
من همه السادات سور المنع
منصور ومديفع ضياها اليشع
وياهم انضم كل غيور وظفر
جملة اعيان امن العجم والعرب
سيد سعيد وكل زاكي النسب
والكازروني الحيد عالي الرتب
واذكر محمد طاهر المعتبر
واما الملك سلمان جاد وسمح
بيها وبحر جوده عليها طفح
شبل الملوك ولا عجب لو رجح
بيها طغا تيار كفه وزخر
والملك لمعظم جمال العرب
عبدالعزيز الضيغم ولا عجب
يجري السحاب ابما وكفه ابذهب
وابكل ملكه العسر حاشا يمر
اسعف جميع المسلمين ابمدد
منه وجوده عيب يحصى ابعدد
انقذ الوف امن الكفن واللحد
عز الاسلام الله يمده ابنصر
احيو نفوس تالفه امن الورى
سوو الهم عز وعلا وسيطره
كم واحد امن الفقر ما كل خرى
بيته انشحن يسلام عيش وتمر
هذا الاسعاف اللي جرى ولا شفت
وكم من جنازة ابغير ساتر بقت
بعض الضعوف اجتازته اتطلعت
يومين كلها وراحت ابلا ستر
وأمر البطاقة لا تذكره ترى
منه يذوب القلب ما ينطرى
كلما نكد نسحب غصب ليورى
خمسه ندخلها وتطلع عشر
لو جيت للكمرك شقول وشعد
ننتظر كمبي وجاك كمبي وقعد
ودارت عليه الخلق من كل بلد
رايح وراجع والخلايق تجر
نصبوا سحاحير وعدل رتبوا
حنطه وطحين وعيش بيها اكتبوا
كتاب منخوبين جمله انصبوا
والكل يخدم ما يعدل الظهر
والناس بس افكارها مشوشه
ونار الغلى تسعر ابوسط الحشا
هذا يقول البارحة ابلا عشا
وجيت اعلى ريجي وبالغدى شالفكر
واحد اسويعه وتنقضي حاجته
او واحد سبوع امعطه امكدته
امقطعه اجداكه ابروحته وجيبته
وكلما حجا ايقولون مالك صبر
والمستشار ابهمته والعزم
رتب نظام وصار بيه الجزم
بالبلدية أهل المنامة لزم
والكمرك الخارج ومشى الامر
ترتيب بالمجلس علينا جرى
عيش وشكر ميصير لهل القرى
يا ربي هالتدبير من دبره
ايموت الفقير ولا ايشوف الشكر
وزعوا الحنطة وكلمن ابديريه
يا خذ نصيبه وترتفع حيرته
وابليس ويا الناس من سيرته
لو شاف شغل العدل صابه القهر
ظلت البياعه تبيع وتظم
انواط زرقه والفقير ابهظم
يبتاع تموينه وهو ينشتم
محد يحامي له وبيه ينتصر
تموين مضبوط اليطب كل بلد
عدهم دفاترنا وبيها العدد
كلمن قصر لازم جيبه المدد
لكن البياعه يخوني كشر
ما بيهم امروه ولا مستحى
بالكيس كم خلوا الهم مصلحه
وباكوه واهله ايجوعها اسمدحه
ووجوها امن الجوع كلها صفر
محد بقى يرعى الامانة ابد
كلمن تولى ايخون ما ظل احد
لكن حكومه وتلطف ابكل فرد
اجرت نظام وشاع بيه الخبر
جملة مراكز بالنواحي تحط
مضبوطه بالكتاب عن الغلط
صبح وعصر تلكى المواتر تخط
مصرف ولا اتدير الحكومة فكر
والحنطة ناكلها ابسهوله وورخص
والسعر كليوم اليجينا ابرخص
متشوف يطلع فرد بيزه الكرض
وابغير بلده كل رغيف ابعشر
هذي تدابير السميده الاسد
المستشار الدوم يرعى البلد
كلى شفت موجوده مثله احد
يجنح على البحرين بر وبحر
متشوف غير اللي يذجك ذبح
وده ابتلفك بس يزيد الربح
مبذول عرضه وبالدراهم يشح
محد كفو يم باب بيته يمر
هاي المراكز شوف بيها اشجرى
نص الدير باوراقها امحيره
واعلى لبواب الخلق متكسره
ارجال وحريم اوقوف مثل اليسر
بالمرخ ما شفت المجاعه الجرت
شفت البطاقات الذي اتعطلت
ميتين كيس وللطرف ما كفت
زادو ثلاثين وتناها الامر
جانت قبل محد يطبها ويجي
واليوم مل اهل الدير تلتجي
ما كانت امعموده اولا ترتجي
واحد على ذيج النواحي يمر
روحه وجيه اتشوف بيها الخلق
صبح وعصر شيعه وسنه طبق
واتشوف مت كل الجهات الطرق
تسرب ارجال وحرم حتى الظهر
تلكي المكابي شايل اخويشته
والبار باري امنغصه عيشته
ولو جاك ساري ايسوق بجحيشته
واما الدرازي طلعته امن البحر
والناس تلكاها ابذاك الرمل
مثل المجانين البليا عقل
واحد ايقول افرط عليه الشغل
والليل جاني اولا انقضى لي امر
وعباس لو روح ابسيارته
كاتب امصرف تعجبك شوفته
امدرب لطيف ولو شفت ركزته
يلحظ الفقرى وزين صاحب فكر
وياه خوش اولاد متمدنه
واعلى الكتابه دوم متمرنه
اتوزع لنا التموين واتدونه
امحمد الجودر شاطر ومعتبر
بالمرخ ضاع اولا استقام العمل
ما صار مضبوط وخذوه بالعجل
لرض البديع بالاداره استقل
والحنطه والكهوه اوصلت والتمر
بلكت ابلطفه المستشار الشهم
يامر لنا ابعيش ويزيح الهظم
ما شوف غيره للاهالي رحم
نرجو يمونا ابعيش وشكر
هسا جميله اتصير وامنظمه
وبالمرخ نهلك تعب ومن الظما
واكثر الفقره اجدامها امورمه
امن المرض والجوع ورملها سقر
بشر بني جمره المركز قرب
من حولها ومركز المرخ اخترب
صرتوا ابراحه امت الشمس والتعب
ويالتطلب التموين عند النشر
عباس يا خونه البطاقة ترى
لاحظها والتاريخ لا توخره
اطفال وحريم اتريد موقشمره
لا يفوتنا التموين وانظل شهر
آه يزمان الفات يمتى يجي
ايزول العسر ويطيب قلب الشجي
يهمومنا المترادفه اتفرجي
ويجنود دولتنا ابشري بالنصر
بالامس كيس العيش يشرى ابتسع
وامر المعيشه اعلى الخلق متسع
واليوم طاري السعر بتسع
ينكسر من صاحب العيله الظهر
هذا الطعام وقوم شوف اللبس
كل وار روبتين ادنى جنس
تالي الحرمه ابيتها تنحبس
والزلم تمشي عاريه ابلا ستر
العدد 3107 - الأربعاء 09 مارس 2011م الموافق 04 ربيع الثاني 1432هـ
