يقولون الجبل لا من تمخّض جاب جرذيّه

وأنا أقول الجبل لا من تكلم هان تحقيره

جبلنا ما قدر ياقف من رياحٍ جنوبيّه

تمايل كنه اللي ناويٍ يرجع على بيره

جبلنا غاص في بير المعاني صاغ رديّه

وأقول الحق ضيعها شعورٍ هام تصويره

جبلنا ما يشوف إلا حقايق شبه ناريّه

لمسها وانشوى فيها وطالت بعض تفكيره

جبلنا يا جبلنا ما تشوف رجال حربيّه

تموت ولا تهادن شخص ميّت في تدابيره

رجالٍ ماتدنّق روسها لنفوس شريّه

رجالٍ فكرها غذّى صغير الشعر وكبيره

صدقنا ما كذبنا يوم قلناها عصامّيه

رفضنا الشعر يوم إنه تمكن فيه شريره

جبلنا لا تروح بعيد وانظر مزن وسميّه

يسيل السيل من حولك وهو مزعجك تقطيره

تحسْب الناس يا مذنب من أفعالك مثاليّه

تحسْب الناس ما تنظر سوى من عين وضريره

زمانك يا جبلنا صارت ألوانه رماديّه

هجر لون البياض ولا عرفنا لون تقريره

زمانك عاف شاعرنا على سبّة أنانيّه

يهون الشعر في عينك وتبحث عن مشاهيره

جبلنا يا جبلنا ما نحب أخلاق غربيّه

على وضح النقى والزيف ما نعشق محاذيره

ترانا من ثلاث سنين نمشي في رفاهيّه

نشوف الدرب واضح والسفر هانت مشاويره

وصيّه تنتبه ليّاك تتبع نيّتك نيّه

ترى نيّتك معروفه وحنّا نحفظ السيره