الدار شابت جفا والدرب ما به خوي

وأنا على العلم الأول شايب راسي

تجمعت واستوت والعقل ما هو سوي

يا خوك والقلب ليّن والولع قاسي

هديتها للفضا يومه طوتني طوي

قسْته على طيبتي واخطيت بقياسي

يوم اعتزتْ وانتختْ كنه هبال بدوي

حاديه ظيم الرجال ولا هو بناسي

ما شفت وش حالتي ساعة علي تْهوي

مثل الزلازل يورالي بقرطاسي

جتني والإحساس مرهف والقلم فوضوي

إما يطيع قلمي أو يصدق إحساسي

ما عاد تبغى سوى دمعه ومعنى قوي

وانا على هيجنتها حل وسواسي

والله لا ارد على حد السما وارتوي

واللي هرج بالقفيّا عاقبٍ خاسي

ماهي هي الاوله كم الجبل يهتوي

ياما من كبار انهارت وانا راسي

لو ولعوها ترى ماني بها مكتوي

اضحك لها من صفاي وعزميُ باسي

امشي على نيتي والملتوي ملتوي

مبطي وانا العفو دربي والوفا ساسي

يا اللي تعيب الهوى والشعر والمهتوي

يموت مثلك ولا يلحق مدى ياسي

لا والله إلا تراني بالهوى منغوي

وهذاك لو مت هو شفي وهوجاسي

عليه يقنب خفوقي والضلوع تْعوي

وعليه ذاب الصخر من واهج انفاسي