( 1 )

أَبَدْ ما يِجْتِمِعْ إِيْمانْ وِاْلْحادْ

وُبَعْضْ اِلْمُسْلِمِيْنْ إِلْسانُهُمْ حادْ

عَلِيْنا بِاْلحِقِدْ شِنْهُوْ اِلْلِذِي حادْ

لاشَكْ إِيْمانُهُمْ مالَهْ بَقِيِّهْ

( 2 )

بِتَقْوَى الله تَبْعِدْ كِلْ بَلايِهْ

بَلاوِيْكْ يا وِفِي لُوْهِي بَلايِهْ

إِلهْ اْلْعَرْشْ يِرْفَعْ كِلْ بَلايِهْ

بَلاوِي اْلْناسْ مِنْ رَبْ اْلْبَرِيِهْ

( 3 )

تِرَكْهُمْ صاحِبِي وُيانِي بَلاهُمْ

وُبَعْضْ اْلْناسْ ما يَخْلُصْ بَلاهُمْ

هُمْ اْلْعِذالْ، قُوْلُولِي بَلَي هُمْ

يِفَرْقُوْنْ اْلْخَوِي وِيّا خَوِيِّهْ

( 4 )

ذِيْ وَطْرْ إِلْلاشْ يا خْوَيِّكْ وَطِرْنِهْ

حَبارَهْ بِاْلْسِمِهْ صِرْنِهْ وُطِرْنِهْ

وُشاهِيْنْ اِلْجَشَعْ عَضْنِهْ وُطَرْنِهْ

أَسَفْ لا حُوْلْ لا قُوَّهْ بِدَيِّهْ

( 5 )

سَحَبْ لِبْساطْ مِنْ تَحْتِي وَلا جازْ

شَعَلْ قَلْبِي بَلا نارِنْ وَلا جازْ

فِعِلْ ما حَلْ فِي شَرْعْ اَلله وَلا جازْ

يِخَلِيْنِي وَلا شَِغْلَهْ بِدَيِّهْ

( 6 )

صِدِيْجِي ما سَأَلْ عَنِّي وَلا صاحْ

وَلا مَرْسُوْلْ طَرَّشْ لِي وَلا صاحْ

مَرِيْضْ اِلْحالْ لا مَيِّتْ وَلا صاحْ

رِجائِي لا تِجِيْبْ ذِكْرَهْ عَلَيِّهْ

( 7 )

عِصاباتْ اْلْشِعِرْ يارَوْا عَلِيْنَا

وَأْنَا عَنْهُمْ وُأَشْعارِي عِلِيْنا

سُفُنْهُمْ كَرُّفَتْ وِأْحْنا عَلِيْنا

إِبْجاهْ اِلْمُصْطَفى وُرَبْ اِلْبَرِيِّهْ

( 8 )

عَزِيْزٍ ذَلْ وِيْنْ إِلْلِي يِعِيْنِهْ

لا حُوْلٍ لَهْ وَلا قُوَّهْ تِعِيْنِهْ

غِزَرْ بَحْرَهْ وُغَطّى الماي عِيْنِهْ

وِيْنْ اَهْلْ اِلْجاهْ وُرْجالْ اِلْحَمِيِّهْ

خليفة العيسى