قبل يشرح لي زماني عن فنون السرمديه

وقبل مالوحة عيوني ترتسم فيها الأماني

كنت أشوف الصمت شرخٍ ينحسب منهم عليّه

وكنت أكابر في طموح وماتعدّى في مكاني

قال جدّي: لاتهد الصرح والدنيا قويه

انت ذراه وش تجي لجبال عسرات القنانِ

نبتكر بعض التكاسل صيغةٍ للعنجهيه

أسمع وصوته ينافي وقتي وجيلي ومكاني

تحترق فيني عصور الزيف... والكلمه أَذيّه

فلسفة وقتٍ عرفته رطبٍ فيها المعاني

أنعقد في حاجبينه كلمةٍ فيها وصيه

قال لي أمسك على - ذيّان - واشار للساني

تصطدم بعض المباديّ الجديده... بأوليه

ويتمخض في يدينا طلسمه تعمي العيان

مالها شكلٍ ولا مضمون... ماهي هندسيه

تعجز الفكره توضّح في معانيها المعاني

ابتسمت بدهشة اللي مرتبك حد الخطيّه

وقال وش علمك (تضاحك )؟ يوم ربي بك بلاني

ارتمى راسي عليه وقلت له (شر البليه)

ضحكة اللي (لالمحته ) فاقدٍ كل الأمانِ

في زمانٍ ينبذ اللي ينتمي للآدميه

واصطلاح الحل أصبح (......) فلانِ