سلامي يا هدوء الأرض هذا أول الإعصار

توحدْت بجراحي والمدى وجهي وآياتي

تشرّبت الهموم وبعض حلمٍ في عيون صغار

وسمّيت الفضا جلدي وسميت الشجر ذاتي

لذا يمّمت وجهي عكس وجه الريح والتيار

نعم مادام ذيب الوقت عمدا مطلبه شاتي

رميتك يا حطب ذكراي في برد المسافه نار

وشفتك يا حطب تخلص وانا بأول مسافاتي

رمادك في يدي شلته سؤال وشوكة استفسار

يجدد بي حريقه واشتعل... تولد بداياتي

وكمّلت الطريق بحلم باكر تنبت الأشجار

على أرضٍ تسميها احتضاراتي... حضاراتي

أقول مسامحك ياللي رفض يدخل معي في الغار

واقول مسامحك يا عنكبوتٍ عد خطواتي

كتبت اللي كتبت ولا قصدت ألْفِت لي الأنظار

ولكني قصدت ألفت لجْوع الناس نظراتي

وانا عامد أوضّح شي واترك شي خلف استار

ولا اقعد ليلةٍ الا وأغيّر قاع مرساتي

وانا شفت الجمال يكون أجمل لو عليه اغبار

لذا تلقى الغموض أوراق لفّتها كتاباتي