يا كثر ما يشتكي... لو يشكي الدفتر

من نزعة الحرف في عقلي وتجميعه

أحيان ما يحنّ في جوفي نبات اخضر

واحيان في ثانيه تورق مطاليعه

يبرق ويرعد خفوقي والقلم يمطر

وانا اتعمّد ظما حرفي وتجويعه

في داخلي صمت... يحتاج انفعال أكثر

من زخرف القول (يا خالد) وتصنيعه

الشعر بعيون اخوك الحلم والمهجر

خوف وبعض صدق تنزفني ينابيعه

وش لون تمطر سمانا والسحاب احمر

والبرق يدمي جوارحنا بصابيعه

محدٍ خبر سيل لا يمطر ولا يحفر

وان جف يحزن ثرى الوادي لتوديعه

كفٍ وحَدْها على التصفيق ما تقدر

لا شفت ما هو مطاوعك الزمن طيعه

ما هو ضروري يلامس جرحك الخنجر

ولا انت مجبور... حتى تعلن البيعه