حبيبي غرّتك بعض الهقاوي وانحنى ممشاك

تبي هاك الطريق اللي تحسْبه ما يجي يمّي

تعبت من اول الطرْقه على دربٍ غدر ملفاك

وصلت بدار تعرفها قديم وقلبك يسمّي

تريّض يوم جيت وحط في دنيا مثل دنياك

ترى كل المرابع تحتريك وضمّها ضمّي

أنا كلي جروحٍ تنزف الآلام قبل القاك

ولكن يوم شفتك صرت همّي واعشقك همّي

تناسيت الجروح ولا بقى بي جرح غير ارضاك

فداك اللي تبي قبل المطالب قلت لك سمّي

صحيح انك حبيبي قبل اشوفك واعرفك واهواك

من الله صورتك بالخاطر اقرب من طرف كمّي

من اول ليل في عمر الغلا لمصافحي يمناك

لْيّا منّه نزف جرح الغرام القاك في دمّي

حبيبي يوم تاخذك القصايد من هنا وهناك

امانه لا طرت سود الليالي ذمّها ذمّي

وانا لمّن سمعتْ احلى السوالف تمتطيها شْفاك

أقلّدها نغم أجمل قصيده قالها فمّي

حبيبي يوم جابتك الخطاوي وانتهى ممشاك

عرفت ان الطريق اللي مشيته رايحٍ يمّي