الزمن لابيض زمانك والزمن لاسود زماني

وأنت تدري وش حصل لي من سبب كذبك ولعبك

شعر عاشق يوم تكتب كنت أحسب انه عشاني

لكن انته وأنت يمّي تلعب بقلبي وقلبك

كنت أظنك مهتونّي ما توقعتك أناني

مصلحة تاخذ وترحل ما يهمك فوح كذبك

لعنبو أصلك علامك ما معك ذرةْ تفاني

كل ما تطلب ألبي... كل عمري لجل حبك

وش تبي أكثر وأكثر ما ملا عينك حناني

ما ملا عينك وجودي واشتياقي حيل قربك

هكذا الدنيا معاكم ما لها أيةْ معاني

المهم اتعيش يومك ما يهمك حدّ جنبك

يالآمتها معيشة عشتها بْظل الهواني

ويش حدّك ع الإهانة مع حبيبٍ لك يحبك

حيث ما في الدنيا زايل من مزايا ومن أماني

بسّ يبقى الطيب والإخلاص والمعبود ربك

يا عشيقٍ مسكنه والله ما بين المحانى

خذ كلام اللي تحدر مدمعه لأجلك وسبّك

كون صادق كون صادق تهتني بدنيا التهاني

واغرس الإخلاص تحصد كل خير بكل دربك