اظلم اتجنى عليه الظلم منك عداله
اظلم اتجنى على اللي ما يبي غيرك بديل
الظلم منك أشوفه مثلما طعم الزلاله
واشعر ان الظلم منك مثل عذب السلسبيل
لك فؤادي يا حبيبي وانت ما غيرك حلاله
امتلكته ابكل نبضه وصار في قلبك نزيل
في عروق القلب شفتك شفت حبك من خلاله
شفت انته بس عنده يالغلا يا أغلى خليل
لك حبيب لو جراله في غرامك ما جراله
ما يفكر لن باله صار في حبك طويل
دايم تبقى حبيبه وانت بس ياللي في باله
راضي باللي يصيبه لو غدى بحبك قتيل
ولا تفكر عن غرامك يعلن بيوم اعتزاله
وانه عن مرمى غرامك ناوي لك بالرحيل
لا ورب الكون ما رضى ولا اقبل بقولي جداله
ومثل حبك يا حبيبي ما بلاقي له مثيل
كيف أرضى ولي خفوق زايد فيه اشتعاله
كيف أرضى والمشاعر كل ابوها لك تميل
لا اتمادى في التجني وشوف لك شي بداله
واحسب احساب لغرامك قبلما تشعل فتيل
اترك الطيش وعناده وابتعد عن هالخباله
لن ما غيرك حبيبي ولا أبي غيرك بديل
العدد 862 - الجمعة 14 يناير 2005م الموافق 03 ذي الحجة 1425هـ