كذبتي تحسبين إني. .. مغفل وإنها... بتطوف

وأنا اللي من دموع العين بالخدين... دونها

تظاهرت "بغبائي" قلت أجاري كذبتك وآشوف

نهايتها معك لكنها طالت... رساينها

لأني أعشقك "فاقد" معك كني عمي ماشوف

وهبتك روح تحيا بك وصرتي قطعة منها

وقلب "حاتمي" يفرح ولو جرحك تجيه ضيوف

يقبل "شايب" جروحك بيده... ويتحضنها

أنا بلسان حبي لك غديت الشاعر المعروف

وإذا قالوا لي يا مبدع ذرفت دموع ساجنها

تعبت اكتب والمح لك عساك بما تشوف تروف

"جروح" لابدى ليلي على الونات الحنها

غريبه! كيف باللي أكتبه حست عبير ونوف

وقلبك عن هوى نفس تحبه مادرى عنها

أفا "يا سيد جروحي" معك هذا جزى المعروف

وأدت "أطفال" أشواقي مع الأعذار دافنها

تبرر كذبتك وتقول: حدتني عليها... ظروف

أنا وشلون أصدق من بعد بانت بواينها

ترى من كذبتك مات الأمان وجا بداله خوف

ولا ادري مقبلات أيامنا وشلون... ابضمنها

ولكن وفر أعذارك ولا تبدي معاها حلوف

أنا ما اقوى على فرقا معاك الروح راهنها

يكفيني من اللي صار وجهك لونه المخطوف

وإلا باقي أعذارك... مع "الزلات" راكنها

وإذا ودك تبي تلعب معاي إلعب على المكشوف

لأنك بالنهاية "خبزة" بيدي... عاجنها

وإذا انك مالك قلبي ترى ما هو حلال ضعوف

لـ "ابن شالح" و"ابن شالح" إذا خربت يطينها