جنون العاطفه يفضح... مشاعر صانهـا الوجدان

وحنين الشوق جنّنـي ولا ادري ويـش اسويبه؟

أفــكّر في أمل تايه... يصـوّر لي بــقايا إنسان

ألا ياهل ترى يرجع بعـــد ما طوّل الغَيــبه؟

ومـعقوله يجـي باكر؟ يلمـلم تالي الأشـجان

ومـعقوله يغيب الأمـــس وننسـى كل عذاريبه؟

وأنا مثّر بي غيابك رسم فيني الــعنا ألوان

سرق حلمي على غفله ترك قلبي بْتصاويبه

سرا معْ هاجس الذكرى تركني للجفا حيران

وصرت بعالمٍ مظلــم كساني الخــوف والريبه

على أسوار الجفا يرسم ملامح صورتك هجران

يحاول قلبي نسـيانك ولكـن شوقـه يجيبه

ويفجّر قلبي العابث جنوووون يبعثرالأركان

جنون الشوق والحيره فضـح أسـرار تعذيبه

أذا أنصفتك بحبي... رجوعك أضعف الإيمان

ولو أنصفني وجدانك... يشوف الجرح به هيبه

وفيت ولا لقيت ألا... الغدر تجزيني يالخـوّان

وفيت وخنتني يعني! جزا المعروف والطـيبه؟

وأشوف الدمعه بعيني ترجّع ماضي الأزمان

أشـــوفه عايشٍ فيــــني وعذّبنـي بأساليبه

الا يا دمعي الشاكي الا يا دمعي الهيمان

كفايه تشتكي حبه ترا اشقانا بأكاذيبه

وانا ادري خانتك عبره ولكن وينها الأوطان

حبيبٍ رخّص ادموعي وهي اول تماري به

يا قلبي ليه ترجعني لماضي فاض بالحرمان

لماضي مقدر آعيشه رغم اني اهذري به

بعدما كنت انا ناسي تذكرني بزمانٍ كان

ترجّعني لدروب الشوق تحرقني بلواهيبه

ورجعت بدربي اهذري وانا كلي ألم واحزان

وحنين الشوق جنّني ولا ادري ويش اسويبه

(أ) أحمد المانع وحديث مع النفس يفيض بالكثير من رهافة العتاب...وتساؤلات العارف أكثر منها تساؤلات الباحث عما يعيد له صواب الأشياء قبل صواب البشر من حوله.

(ب) نص جميل... والأجمل منه هذا التواصل الذي نتمنى أن يستمر ولو كره الدجالون والمغرضون