يَصْفُقْ وُيَفْرُكْ يَدِهْ مِنْ زودْ واهِي بِهْ

اِلدِنْيِهْ ضاقَتْ عَلِيْهْ وِالحالِهْ إِصْعِيْبِهْ

مَحَّدْ يِمِدْ لَهْ يَدِهْ يَقْضِي لَهْ اِلحاجِـهْ

الله يِعِيْنِكْ يُبَهْ وِتْهُــونْ لِمْصِيْبِـهْ

***

يِلْعَـبْ بِكِلْ اِلْوَرَقْ مَحَّدْ كِشَفْ زاتِهْ

فَنّـانْ فِـي لِعْبِتِـهْ وِمْسَوِّي إِسْواتِهْ

ما شِفْتْ فِيْهُمْ رَجُلْ يِقُوْلْ لَهْ بَسْ حَدِّكْ

ياخِذْ بَلَيّـا حِسابْ مَعْرُوْفَـهْ نِيّاتِـهْ

***

يا غافِلِيْنْ لي مِتِهْ مَحَّدْ دَرَى بْحُولِـهْ

لاهِيْــنْ بِنْفُوسِكُمْ وِعْيُونِكُـمْ حُوْلِـهْ

يا كُبْرَهَا عِيْنِكُمْ بَسْ لِلأسَفْ ما تْشُوفْ

اِلماي زايِدْ تَرَى وِلِطْحِيْنْ مُبْ حُوْلِهْ

***

وَلْـدْ اِلمُدِيْرْ إِشْتَغَلْ وَلْدْ اِلفَقِيْرْ عاطِلْ

مِنْ وِيْنْ يَكْسِي هَلِهْ وِمِنْ وِيْنْ لَهْ ياكِلْ

إِمّا يِذِبْحِـهْ القَهَرْ أَوْ لِلْحَرامْ يِـرُوْحْ

عِيْنِي عَلَى أَهْلْ الفُقُرْ مَحَّدْ لُهُمْ سائِلْ

خليفه العيسى