ليه اعتذرْ رغم الغلطْ منّكْ ؟

واحلى اعتذار يلمّني ويضمّني

كلمةْ خَلاَصْ وأُصْ؟

***

ماقلتْ شيْ ...

ماقلتْ غَيرْ انِّكْ بدايةْ

هالولَهْ ونهايتهْ ...

ماقلتْ غَيرْ انِّكْ سُوَالفْ

هالعذابْ اللي كسرْتْ مْرايتهْ ...

ماقلتْ غَيرْ انِّكْ صباحي المنتشي ...

بوردة ضفايرْ والندى ...

ومريولْ تشرقْ حصّتهْ ...

***

حاولْتْ كَمْ حَاولْتْ ...

حاولْتْ أنسى انّك هنا وهناكْ ...

لكنْ لقيتْ انّي خَطَا معناكْ ...

انتي هنا كذبهْ ...

أحلى مدى الكذبهْ ...

وانتي هْناك بخاطري ...

كلّ الصباحْ المنكسرْ ...

كلّ الليالي المترفه... العذبهْ ....

***

بْعينكْ كِثيرْ اشيا ...

حزن وفرح ...ميلادْ ... موتْ

اعيادْ والتأبينْ ...

ليتي اعرْفِكْ مِينْ ؟

كنتي معي نبض الحياة اللاهثْ المرتاعْ ...

وانا معك طفلٍ جمع اشياهْ

في زحمة فرح ...ثُمْ ضاعْ ...

***

خايفْ تجي عينك بْعيني لَيهْ ؟

وعيني تقل لَبّيهْ ...

بردانْ من تيهك وانا

حصةْ دفا ... جمرك ...

ليهْ اشعر انّك في حُضور : غْياب؟؟؟

وحزنك عجز يحلفْ يتوبْ

من الحزِن: ما تابْ ...