(أ) محمد آل مبارك وقصيدة مفعمة بالغامر والزاخر من المشاعر النبيلة.
نسيت النوم فغيابك وقلبي ما قدر ينساك
نسيت الراحه في قلب التعب كله على شانك
رسمت الوقت وقفت الدقايق والهدف لقياك
سهرت الليل وحاربت الظلام بنور وجدانك
اسرت النور في كفٍ بداخل خافقٍ يهواك
وحاصرت الغرام اللي مع صمت الوله صانك
أنا فـرحلة غيابك انتظر وجهك على الشباك
واقابل وجهي بوجه الطريق والمح أوطانك
عناوينك سراب المح عيونه والتقي بشفاك
ومراسيلك حمام ابيض تربى من على اغصانك
انا وان طالت اعيوني بنظرها واوصلت لخطاك
وتمايل طرفك بعيني على معزوفة الحانك
يفز القلب في صدري واهو اللي كان يتحراك
على جمر الوله جالس يبي لو يلمح اجفانك
شهور تمر يحسبها سنينٍ والعمر يفداك
المها يسري فـضيق العروق بشوق تحنانك
عيوني كيف بس تغفى واملها تلتقي بعيناك
وصدري ما غفى لحظه وفي كفيه بركانك
تسافر لآخر الدنيا وشوقي يلحقك لهناك
شهيقي ينتظر ريحٍ تسابق ريح ريحانك
نسيم الشوق ياخذني لحبٍ من غلاك اغلاك
يبعثر وحدتي جمبه والاقي طيف مرجانك
وانا اللي بك نسيت النوم وقلبي ما قدر ينساك
نسيت الراحه في قلب التعب كله على شانك
(ب) منذ تواصله الأول مع «ريضان» ومحمد آل مبارك يثبت يوما بعد يوم أنه قادم بقوة في المشهد الشعري الشعبي البحريني.
العدد 1690 - الأحد 22 أبريل 2007م الموافق 04 ربيع الثاني 1428هـ
