شمل عفو القصايد كل منهو بالمحبه خان

دخيلك لا بغى يصحى ضميرك لا تصحّيني

أحس إني مثل سجنٍ تشكّل كنْ به سجان

ولابه غير بيبانٍ تلاعب معْ شراييني

شعوري من يقول انه جنون ووغدنة صبيان

غموضي وإن بغى يقدر يفسرني ويبكيني

أنا ماني من اللي لا بغى يزعل بدا زعلان

أنا لامن زعلت أزعل ولكن ما تعرفيني

غرور الشعر يلبسني وأحس ماني أنا با انسان

وأشوف الأرض ما تسوى توقّف تحت رجليني

ترى فيــني تعاويذ وترانيم وخفايا جــان

تبقّــت يوم ما كنتي عن الدنيا تســليني

وتراني قادر أهدم لك جميع اللي بقى بلسان

وحتى بيت هجرانك أهدّه لين يبنيني

بقى بي خير خبّيته عن الدنيا تقل خجلان

أخاف الناس تدري به ويمسي شر في عيني

على فكره... أنا ما ابغى من الدنيا لقى وأشجان

تعوّدت الشقى لكن أبآخذ ثار مشقيني

لك الله كل ها الدنيا توقــّف عند صوت أذان

تساوت توبتي لكن ذنوبك ما تخليني