أول ما نبدي القول

نقول

صلوا على...

مسك الختام ميكونش قبل البسمله

آه يا بلدنا يا بلدكم يا وله ...

سور الحقيقه مطوله

لا النار بتمسك في اللي عنده هدوم ولا...

النيل دليل الغرقانين ساكتين ولا...

الطين ضمير العرقانين في الغيط ولا...

كل (الخشوم) بتصوم إيمان اليوم ولا...

تكبر ديوك البيت وفاضيه الحوصله...

تكبر عيال اليتم جوه المرْيَله

ترقص بنات الفكر فوق المنجله

آه يا بلدكم يا بلدنا يا «بلا»

لا «البحر» قادر يطفي جوف الغلغله

ولا حد فاهم سر حل المسأله

يا شعب صابر ع الغلا

«ما ودعك رب العباد وما قلى»

فيه ناس كتير آه يا بلد يا مطبله ...

دافنين عقولهم في الرمال زي النعام

والطفل نايم في التراب تحت الزحام

بتفوت هموم (تبصم) في دفتر قيد ميلاد المولودين

والخلق ضاق جوه الخلق

أزمات كتير والسكه ضاقت ع الولد

والشيله تقلت والكتاف رافضه الهدد

والأزمه بتشد المدد

خدم الكبار بيهزئونا ونحتقـر...

ويعبوا بينا المعتقل...

ناس وارتضوا نعيش محرومين

ضاق الماعون ولا فيش خضار

إن نمنا واكلين «نحمضوا»

وإن نمنا بالجوع نحمده

ولا عدنا قادرين ننهضوا

امتى اليومين دول ينقضوا؟!

امتى اليومين دول ينقضوا؟!

الضرب على البطن ابتدا

ومالناش (ظهور)

وظهورنا من ضرب البطون صبحت «قفا»

شبعان تفور- زي القدر - فوق (الكانون)

والسوس نخر عظم الكافور

وبنات (بترفع) صوتها في الحزن القديم

بيتنا اتنقل من بيتنا والوضع انقلب

بابنا اتورب والأرض لسه بـ تغتصب

ولا عاد لهب يطفي الغضب

ولا عاد غضب يطفي اللهب

الغيط «نضب» والنخله ما بترميش رطب

والبت بتلم الحطب والعصمه في إيد (الديب)

يا شعر اوعى تغيب...

وكفاية بعد سنين رجعت عرفت مين...

سرقوا و(مضوا)...

خطفوا و(مضوا)...

ناس وارتضوا نعيش محرومين

يا خوانا خايفين ننهضوا

إمتى اليومين دول ينقضوا

إمتى اليومين دول ينـ ... قضوا؟