يفوق الوصف حبي لك يدارٍ حبها مولود

معي من جيت للدنيا بدمي حل وعظامي

ويكبر كل ما أكبر وشوقه دايمٍ في زود

يحرك وجد في قاصي الحنايا دائماً كامي

يصرّح بالغرام اللي تفجر والحشا موقود

ويشكي من صدى جرحٍ نزيفه دايماً دامي

غرام الأرض ذا شيءٍ عظيمٍ ماهو ابمحدود

وهو اللي من صنوف الحُب دايم شامخ سامي

اذا حُبْ الوطن شاقك يجاوز بك سفر وحدود

ويعبر بك بحارٍ عاليه لوموجها طامي

يدار الحُب ياجنه سحرتي رجالنا والخود

خيالك ما يفارقني ودوم القاه جدامي

ولو بعّدت أنا عنّك أحس إن العقل مفقود

ويرجع لي إلى منّه وطت في ارضك اقدامي

أحسج في فؤادي نبض وفي عيني نظر ممدود

على مد البصر أنظر جمالك وارسم أحلامي

أنا شاعر رهن شعره لداره والقوافي شهود

ربع قرنٍ وأنا اترنم بحبك واعزف أنغامي

هوى داري ينطّقني واسهر بالليال السود

وشيطان الشعر عندي يصول وتنزف أقلامي

ويزيد الشعر تشريفٍ إذا إسم الملك موجود

ملك قلب الشعب دايم بطيبه نسل لكرامي

حمد من للمكارم قد سعى في كل يومٍ زود

وشاد بمنجزاته والمكارم كل الاعلامي

زعيمٍ والزعامه ورث من آباءه ولجدود

لهم مجدٍ تعلى من عهد سامٍ مع حامي

حمد من بالسياسه قد بلغ شانٍ كبير وعود

سياساته حكيمه قد نهجها عبر الاعوامي

وانشا للبلد دستور وهذي غاية المقصود

ونوابٍ مع شورى وسط مجلس لهم نامي

أبارك لك يبوسلمان وهذا اليوم يوم سعود

فعيد الدار وجلوسك حلّو وسط الانسامي

جلوسٍ ياعسى كل عام ياتي بالهنا ويعود

وعسى المولى يحقق لك بفضله كل الاحلامي