قلت الحقيقه قالوا الناس صعلوك

جيت آتصعلك ما قنعت الصعاليك

من عاش بالحيره غدا عبد مملوك

تلعب به الأحزان ويزيد تشكيك

والصاحب اللي قال مره أنا أخوك

عوّد على سلم العداوات ويحيك

مدري ورث بيتين وريال وصكوك

والا يبي يحكم بحكم المماليك

كم كنت له... مازلت له باب مصكوك

أحفظ له أسراره على ذاك أو ذيك

وأثر الجزا ينصب شرابيك وشروك

ثم قلت يا صاحب عسى الناس تفديك

اخذ النصيحه من رجل كنّه أبوك

ماني كبير السن والحال ينبيك

أخذت لي من ذا الزمن ضيم وشكوك

لا تحسب إن الوقت يا صاح يرضيك

دنياك وإن زانت لحكام وملوك

لابد من يومٍ تفاجيك وتجيك

كم حوّلت يختٍ كبيرٍ لسنبوك

واللي من أول باعك اليوم يشريك

وإن جاك من نفط السعودي وكركوك

حافظ على السمعه عسى الله يعليك

الرابح اللي عاش به طبع مبروك

والخاسر اللي دايم الدوم يغويك

ادرس رفيق الزيف وبدرس محبوك

والصاحب الوافي على طول يوصيك

قول الحقيقه لو يقولون صعلوك

ما عاد للكذّاب وجهٍ يراعيك

خلّك رفيع الراس وإن صرت متروك

أفضل من الرفعه من اللي يوطّيك

والله لو دمّي على القاع مسفوك

ما هين راسي لو وقعت بتهاليك

محدٍ يدوس الشوك ويقول مشيوك

إلا الذي يرضخ كما البط والديك