يا لمآسي فكرة الشعر عنّك وش تقول

لا اختلط ليل المواجع بفجر الهيمنه

الشوارع ممتليّه جوانبها سيول

من دما شيخٍ وطفلٍ وامرأه مؤمنه

والشباب اللي زهرها يسارع بالذبول

في رفح وإلا بغزه وسط مستوطنه

من فدائي يحب المواجهه والنزول

أو بريءٍ ينتقل غافلٍ في مسكنه

أو رجل مُقعد تمسك بمنهاج الرسول

بالجهاد اللي بصوته وفكره يعلنه

من على الكرسي ينافح ويتحمل حُمُول

من أجل أرضه وشعبه ووحدة موطنه

ما رضخ للخوف وأسرع بنفسه للوصول

للجنان اللي بشوقٍ وحبٍ تحضنه

كان جالس معتكف يرتجي منه القبول

بين سجاده ومصحف وذكر ومأذنه

أحمد.. اللي يوم قتله أُصِبنا بالذهول

لو هو من شعب الشهاده مُناه وديدنه

والطبيب اللي توعّد عدوه بالفعول

بانتقامٍ لازم انه في يوم يبرهنه

ما خشى تهديد يصدر وتُقرع له طبول

لين جاه القصف يحمل ضجيج الأمكنه

السنين اللي قضاها جعل منها فصول

في كتابٍ للقضيه يأرخ أزمنه

لنّه الرنتيسي اللي بكل فعلٍ وقول

متصف من وصف اسمه بعزه تسكنه

لكن أقطاب العرب تنتظر بعض الحلول

وما لقت إلا تعنت وحقدٍ يشحنه

والجدار يسير دربه وتُجرف له حقول

وللأسف كل المشاعر بعدها ساكنه