قال البناءان البحرينيان يوسف المحرقي (السنابس) وحبيب عبدالله حبيب (الحجر) إنهما مازالا متمسكين بمهنة البناء منذ العام 1977 (نحو 43 عاماً) وحتى الآم، على رغم أن البحرينيين هجروا هذه المهنة منذ سنين طويلة، وتحولت كلها إلى الأجانب.

وخلال حديثهما لبرنامج «الناصية» الذي يبث على «الوسط أون لاين» اليوم (السبت) ذكر حبيب والمحرقي أن مهنة البناء على رغم أنها متعبة ولكن تعوّدا عليها مع الاستمرار والصبر، وأكدا أن مدخولها المادي جيد، وليس هناك مهنة ليس لها أي مدخول، ولكن البحرينيين لايحبذون العمل في هذه المهن الصعبة.

وأردفا «الناس تبغي الراحة، تبغي الأيسي، الحين تقدر توقف في الشمس ساعة؟ ما تقدر، الحين منهو يقدر يشيل ليك كيس سميت فيه خمسين كيلو؟ شباب الحين عمره 16 أو 20 سنة ما يقدر، لو بيقدر يعني بيتعود مرة مرتين، بس ما بيصبر حق هذي الشغلة».

حجي حبيب سولف لينا من متى تعلمت البناء؟

- والله تعلمت سنة 1977.

محرقي وقف شوي بس؟

- كنت في البداية ويا أخويي المرحوم فكنت عامل وتالي صرت بناي.

سنة كم؟

- 77، فتعلمت إياه وتميت عامل وبعدين أشوي أشوي تعرفت على الشغلة وأخذت المهنة، وواصلت أبها إلى حد الآن.

يعني اشتغلت أول شيء في البداية عامل؟

- نعم، ومن بعد حوالي 3 سنوات 4 سنوات تطور الشغل عندي وصرت بناي.

وحالياً؟

- حالياً نفس الشيء.

يعني تأخذ البيت من الأساس لين ما يكتمل؟

- على حسب الشي، راعي البيت يبي الشغل باليومية يبيه بالمقاولة نأخذه من عنده.

وهل فيه فرق كان بين الأول وبين الحين في البنيان؟

- والله طبعاً فيه فرق من الأول، الحين فيه فرق واجد.

فيه فرق من أي ناحية؟

- من ناحية اليد العاملة، الأول تتوفر الحين ما تتوفر، لأن كله أجانب يجون، فما تحصل إلا قليل اللي بيشتغل، يعني اللي محتاج بيشتغل اللي مو محتاج ما يشتغل مستحيل يعني.

ليش لأن متعبه مثلاً؟

- أيه متعبه طبعاً، متعبه هذي يبي ليها صبر إذا ما عندك صبر ما تقدر تواصل فيها، هذا العامل اللي وياي هذا عامل فني شغل حديد نجارة الطابوق يعني أي شغلة.

الأول تشتغل طبعاً باليومية يعطونك؟

- أيه، أول ما ابتدينا اشتغلت يعطوني دينار ونص هذا سنة 77 وبعدين أشوي عرفت الشغلة وعطوني زيادة صرت 3 دينار إلى حد الحين 12 دينار.

والحين تأخذ البيت من الأساس ماله وبناء أسود؟

- أيه لازم نبنيه من الأساس.

تعرف يعني للخرائط؟

- الخرائط طبعاً نعرف ليها من سنين هذا العمر كله لازم نعرف أكيد. الشاخورة هاكو سوينا الحصاير كل شيء نعرفه؛ من الحديد نسويه أبروحنا.

أنزين المحرقي أنت من متى تشتغل بهالمهنة؟

- أنا من زمان والله من 77 كان أشتغل من نجار كنت أشتغل وبعدين ضميت في البلدية وعلى طول وصادتنا هذي الشغلة على طول.

أنزين وهل هذه الشغلة صعبة على البحرينيين؟

- لو تلاحظ أيه صعبة بس أحنا تعودنا على هذي الشغلة.

يعني ما فيها مدخول؛ أو صعبة لو متعبة؟

- فيها مدخول، ما ميش شغلة ما فيها مدخول ولكن البحرينيين ما يبغون هالشغلة.

بس يبغون الراحة؟

- الناس تبغي الراحة تبغي الأيسي، الحين تقدر توقف في الشمس ساعة ما تقدر، الحين منهو يقدر يشيل ليك كيس تحت شباب الحين عمره 16 أو 20 سنة يقدر 50 كيس سميت فيه خمسين كيلو ما يقدر أيشيل، لو بيقدر يعني بيتعود مرة مرتين بس ما بيصبر حق هذي الشغلة كاملة يتراوى ليي. واحنا مو كنا عاطلين، أحنا طالعين تقاعد من البلدية.

بس ما هديتون الشغل انتو للحين مواصلين؟

- ما هدينا الشغلة بالعكس جودنا، أحنا كل ما تعب جسمنا ارتحنا جان أرقد في الليل، ما شوف فيه أشكال يعني هاذوا نشتغل عادي بس مو كل واحد يتوطى يشتغل بحريني صراحة.

هذا أنتون اشتغلتون؟

- هذوا أحنا نشتغل يعني....

قصدك الشباب الحين؟

- أيه ما يقدر يشتغل

ما جاك مثلاً واحد شباب قال ليك أن أنا أبغي أشتغل أتعلم هذه المهنة هذي؟

- لا ما قط جاء واحد.

ما يجون؟

- لا، اشتغلوا ويانا يعني مو ما اشتغلوا، يشتغل ليه يومين ثلاثة أيام يقول ليك كل محل أيألمه يقول ليك يوم ثاني بس ما بجي والله يوميته نعطيه 6 دينار شغلنا بعد مو إلى الظهر من الساعة 5 إلى الساعة 11 ونصف 12 إلا ربع بس نبند، بس أحنا نعطي الشغل فوق حقه يعني قعده ما فيه على طول.

تذكر كم بيت بنيت؟

- والله بيوت أيه يمكن تقريباً القرى كلها طبيتها، من الرفاع وأنا جاي في الرفاع في البسيتين الشاخورة مدينة حمد هو طبعاً بيوت واجد، وهذا أحنا جينا أهني في الدير بيت علي حسن والمصلى وبني جمرة كل محل، أنا بالنسبة لي على قولتهم ايدي بكل مكان. احنا مرغوبين في الشغلة إذا اشتغلنا في البيت راعي البيت ينسى البيت أن أحد يشتغل فيه.

السبب؟

- السبب لأن أول شيء راعي البيت ما يشيل هم يجيب لسميت، أنا الخرسانة وأي شيئ كل أقوم بالدور أنا عنه، هو عليه بس أيمولني بالمبلغ.

فوق هذا تشتغلون شغل مضبوط؟

- المضبوط أيه، لكن أهني شغلة وأهني شغلة، وأهناك شغلة أحنا عندنا ملايين الشغلات، بس أحنا عدنا شغلتين بس حق لا أكذب على راعي البيت تعطي الصدق وياه حق أتصير مطلوب عنده.

وكم تأخذون ليكم في بناء البيت؟

- والله أهني يعتمد البيوت يعتمد فيه تأخذ ليها فيه شهر، البيت كامل لا.

البيت كامل أن أقصد من الفنديشين؟

- ستة شهور.

وأنت تتكفل بكل شيء؟

- كلشي أحنا بناي واحد والبقية فنيين، والعمال يعني هذي شغلتهم هذي ما نأخذ يعني أجانب ما نجيب لو بنجيب أجنبي نعطيه بحريني.

ما توقفون في الإجازات؟

- لا إلا إذا كلش، الجمعة ما ميش بند على طول بس محرم.