- سلام خوك.
- أهلاً.
- وينك من زمان ما نشوفك تدخل على الشات؟
- ويش أسوي بعد، مشغول واجد هالأيام. ما أدري شلون الدنيا غفصة صايرة وأحس روحي متخربط واجد هالفترة.
- ليش؟ ويش صاير يعني؟ بحسب علمي أنت ما تشتغل ولا تدرس.
- أنا قررت أتزوج.
- تتزوج!!
- إي أتزوج، ليش ما أتزوج يعني أنا مو رجال؟
- أنت رجال أكيد، بس صراحة شكلك مو مال زواج، اسمح لي يعني. أولاً: ما عندك شغل.
ثانياً: ما تعرف تلبس ثياب كشخة، ثالثاً ما أعتقد في ابنيه بترضى تتزوج واحد ما عنده إلا ثانوية عامة خاصة في هالزمن. وإذا تبغي الصراحة، ما أدري شلون أقول ليك، بس في ناس ما يطيح عليهم الزواج، ما أدري شلون، بس تحسهم مو مال زواج ونسوان ومسئولية، وانت، مع احترامي الشديد يعني، منهم.
- مو شكلك هزأتني واجد.
- مو تزعل خوك، أمزح وياك، صدقني أمزح.
- صل على النبي، هذي مي مزحة. أعرفك أنت كله جدي، يا زعم تمزح لكن إلي في جبدك اطلعه كله، وبعدين تضحك عشان أفكر مزحة. المهم صدق أنا أبغي أتزوج ورحت شفت لبنيه بعد. وألحين أنا كله مشغول.
- شفت لبنيه؟
- إي، والله العظيم، بارحة أمس شفتها.
- ويش كشخة؟
- مو شغلك. هادي أسرار والمره احتمال اتصير زوجتي وما أقدر أسولف ليك عنها.
- احتمال!! ليش احتمال اتصير زوجتك، ليش مو أكيد يعني؟
- الجماعة يبغوني أشتغل أول.
- عدل له، لازم تشتغل أول، عجل شلون بتصرف على زوجتك من غير شغل؟
- قلت ليهم بشتغل بعد الزواج، قالوا ما يصير لازم أول تشتغل وبعدين تتزوج. وأكو ألحين أدور شغل من مكان لمكان.
- ليش ما تشتغل حمالي في المركزي، صراحة شكلك يصلح. ها ها ها.
- إي، اضحك، لو انت مكاني ما ضحكت جدي.
- صراحة الغلط منك. شلون تبغي تتزوج وانت ما عندك شغلة في إيدك، بروحه فشيلة تروح بيت الناس تبغي تتزوج ويقولون ليك أول اشتغل، لازم تعرف المعروف بنفسك. إذا كنت تبغي تتزوج شوف ليك شغلة أول حتى لو بارت تايم، أهم شيء يصير عندك كم روبية على الأقل لفترة الخطوبة، وقبل ما تتزوج لازم يكون عندك شغلة عدلة. بس ألحين مش روحك بشغل جزئي على الأقل.
- عدل كلامك، يبغى ليي شغلة
العدد 1428 - الخميس 03 أغسطس 2006م الموافق 08 رجب 1427هـ
