أكبر من حْدود السوالف واجي (صمت)

ليمن تعب غيري يسوق الحكاوي

ليه السهر؟! والعين عيني ولا (نمت)؟!

ليه التعب؟! قلّي: (على أيش ناوي)؟!

يا صدر!! هيّ!! يا صدر!! كنّك تبسّمت؟!

ما كنّ بين الحدب طفلٍ شقاوي!!

ما اشْينَك يا شيخ الألم لا تكلّمت

كنّ الوجع (حيّه ومزمار حاوي)

ليمن تجي تحكي وفجأه!! تلعثمت

تصرخ: أنا!! (لا...لا) وماني بقاوي

كنّك وضيق الدرب جبرٍ تولمّت

سارح ولا تدري على وين تاوي!!

ثلثين من ليلي قضو/ توّ ما (نمت)

و(ثلث الأسى) مقبل يجرّ الخطاوي

وهذا الحصى اللي جيت بيدي ولملمت

ما عاد يكفى كلّ نابح وعاوي

تدري وش اللي بعد هذا تعلّمت؟!

يوم أكثر اللي شفتهم فكر خاوي؟!

يمّا تجي كـ الريح و(ت ب ع ث ر) الصمت

والا تعلّم كيف تسمع حكاوي