لا ما وطيت الشعر بس اعتليته

حقي وانا معتاد ما اضيّع الحق

جيته وانا سيد العبيد اشتريته

ثٌمّن عتقته قبل لا يطلب العتق

فيه التزمت وما التزمت ونسيته

آلام راحت بس بقى باقي الحرق

يطري عليّ احيان لو ما طريته

ويدق ناقوس الذكر داخلي دق

بي بيت شعر وساكن الشعر بيته

ملّيت انا اطرق بابهم صاحبي طرق

وفـ كل بيتن يرفع المجد صيته

فيه السكوت أكبر علامات للنطق

آنه الذي بحروف شعري بنيته

شعرٍ لصق باذهان من يسمعه لصق

لك حق ما تسمع اذا ما بغيته

وان ما سمعت الرعد ما فاتك البرق

لا والذي في كل سجده دعيته

اللي بأمره لو بغى يغرب الشرق

لا ما احترفت الشعر بس اهتويته

وبين الثريّه والثرى شاسعٍ الفرق

ولو كان بيدي من زمانٍ سليته

بس عادتي والله ما اضيّع الحق

الوفى

الوفى شي (ن) قديم اتذكره

والقديم اتذكره شي (ن) وفي

وان حصلي ما ذكرت اتصوره

كان موجود (ن) قبل ينفى نفي

غشمره لا لا تصدّق غشمره

الوفى كذبة عجوز مخرفي

مثلها مثل القناعه ثرثره

اخترعها للفقير المكتفي

أحمد الله كل سجده واشكره

ان بعدي واقف (ن) في موقفي

لابس (ن) ثوب (ن) لجسمي يستره

وان بردت ألقى الكرامه معطفي

ذنبي اللي ما قدرت استغفره

اني زايد بالمشاعر عاطفي

شايل (ن) بيدي شموع (ن) ممطره

ذابت بإيدي وعيت تنطفي

والغيوم إليها ثقلت به تنثره

حففي يا زين ثقلك خففي

والحروف إليا تجيك مبعثره

احسن ولا عن عيونك تختفي

أنا حبيت

شوفك هناي وجلستي معْك منوه

والقلب يخفق لو على البال مريت

يا نور عيني كلي أصبحت فدوه

وكلي غطا ليمن بردت وتغطيت

حبك قصيد وأصبح اليوم غنوه

وكلي تشرّف يوم انا فيك غنيت

لجلك خلق ربي لنا «نون» نسوه

يوم الانوثه بانت بيوم هليت

انا اشهد انه فيك كل شي نقوه

وزايد حلاك بزود عما تمنيت

لا ما جبرت القلب للحب عنوه

ويومه طلبني ما ترددت لبيت

جيتك حبيبٍ للمحبين قدوه

لولاي احبك كان والله ما جيت

وجيتك فقيرٍ يطلب الحب ثروه

من باب بيتك جيت لا ما تعديت

وجيتك عزيزٍ وقفته معْك عزوه

لي من تعبت من الزمن به تضريت

ياللي غرامك بلسم القلب ودْوَه

كلي حلالك لو تكرمت ناديت

من قال لك ان الهوى دوم بلوه

ما شفتني يومي هويتك تهنيت

وودي انادي بعالي الصوت واقوه

حبيت انا يا ناس انا إيه حبيت

لي طَلْبَةٍ عندك ولي منك رجوه

انك تصارحني اذا بيوم حبيت

وان كان لك مكتوبٍ بيوم تهوه

ياليت أنا ياليت أنا بس ياليت

ناب الصبر

يا حبيبي صرت بعيوني س/ ر/ ا/ ب

يكفي انك بالهموم اشبعتني

منك والله بدنيتي شفت العجاب

شفت كيف انك تهد المنبني

كم بنيتك مجد عالي للسحاب

كنت انا ابني فيك وانت تهدّني

وكم بعدت وقلت كافي هالعذاب

كل ما ابعد شوف دمعك ردّني

اكره اكره كل لحظات العتاب

وانت وحدك للعتاب اتّلني

قلتلك مره... ترى للصبر ناب

شوف ناب الصبر شوفه... عظني

ما صرخت من الوجع وقت الغياب

بس صرخت ارجوك/ ابعد/ خلّني

ذي جروحي علها اجر وثواب

بنسحب بسكات دامك بعتني

هاذي الدنيه هجوم (ن) وانسحاب

والنخل لا طال لابد ينثني

ومن يدق الباب بيجيه الجواب

وكل شي فيني هدمت بينبني