العدد 1988 - الخميس 14 فبراير 2008م الموافق 06 صفر 1429هـ

ملف خاص بتجربة الشاعر العراقي مظفر النواب...وانتظرت عرسها المستحيل

وأنتظرت عرسها المستحيل

يا ريحان

أشكد نده...

نكط على الضلع

ونسيت أكلك... يمته

أشكد رازقي ونيّمته

وأشكثر هجرك عاشر

ليالي الهوى وما لمته

إنت سحنت الليل

بكليبي

وكلش موش أنت

***

يامه التراجي مرجحن

حسك الصافي وغفه

ويامه الدمع ضوه سواد العيون

جانت ترفه

وتدري تنيت الدفو

بلهفه ورده

وما جيت ونيمني الثلج...

والشته كله أتعده

لا بالمحطة رف ضوه ولاخط جانه من البعد

لا ريل مر على السده

والشته كله تعده كله تعده

وأعلكنه للصيف اليجي

روازينه السمره...

شمع

من ينزل أول الدفو بنيسان

يهتز نبع

يمكن يخضر دمع...

يمكن بعد بالروح، يا ريحان وصله تنزرع

والكيظ أجانه وأنكضه ورد أنكضه

ورد كيظ أجه

والزلف هجرك فضفضه

ورد فضفضه

وما مش رجه

***

ولساع من همسه تجي من بعيد

يخضر دمع

كل نسمه ترفه من تفك الباب

يخنكني الدمع

لساع... ولذتنه أنكضت

أهجس على الكصايب شمع

وردود أكلك... يمته؟

أشكد رازقي

ونيمته

أملني يسمر بيك

كل عمري أنكضه وأملته

حنه خيالك بالحلم

خايف يجي وأمنته

كل لحظه من هذا العمر

وعت حسافه بكلبي

يا أول الريحان يلعطيت

نويه بدروبي

في آخر سوجي حنيني وحبي

من يوم طيفك هجر نومي ما نمت

حنية يا جذاب منك

ما شفت

من ظني كضك بالحلم

عنبر فحت

من ردت أجيسك جست روحي

وفرفحت

أترف من أجفاف المهر

قندون... ما ضايك شكر

يا حلو يا بوسة سهر...

يا ترف يا ييزي قهر

شيضرك... بكل شته الولهان

لو صحوة مطر؟

والشته كله تعده

والكيظ هم أتعده

شجاب العشك؟ وأشوده؟

لا بالمحطه رف ضوه...

لا خط أجانه من البعد

لا ريل مر على السده

***

ولساع... مشدوده شبكتك

عل الخصر

والركبه من تلتاف للبوسه

جسر

بس أنت تدري شون رصعة بالنحر

والشته شايل شليله

من يمنه وعبر

واسألته ياشته العشاك

ما عندك خبر

لك يا شته العشاك ما عندك خبر؟

والكيظ أجانه وأنكضه ورد أنكضه

ورد كيظ أجه

والزلف هجرك فضفضه

ورد فضفضه

وما مش رجه

العدد 1988 - الخميس 14 فبراير 2008م الموافق 06 صفر 1429هـ





التعليقات
تنويه : التعليقات لا تعبر عن رأي الصحيفة

  • أضف تعليق أنت تعلق كزائر، لتتمكن من التعليق بـ3000 حرف قم بـتسجيل عضوية
    اكتب رمز الأمان

اقرأ ايضاً