يا بني ظلعك من رجيته

لظلعي جبرته وبنيته

وأحسب الشيب اللي من عمرك جنيته

يا بني طش العمى بعيني

وجيتك بعين القلب أدبي على الدرب المشيته

شيلة العلاكه يا بني

تذجر جفوفي بلعب عمرك عليهن

سنه وجفوفك وردتين على راسي

وبيج أناغي كل فرح عمري النسيته

يا بني شوفك يبعث الماي الزلال بعودي وأحيا

وآنه ميته

أبيض عيونك لبن صدري

وسواد عيونك الليل اللي عد مهدك بجيته

وابنك التوه يناغي الخرز بالكاروك يا بني

كتله لا تخاف اليتم جده

كتله يا بن وليدي من يجبر على الأيام

تلكه حزام ابوك الماطواني وما طويته

تلكه منه خطوط اضمهن حدر ضلعي

لحد ما موت بعز على السر الحويته

يا عمد بيتي وكمر ليلي

وربيع الشيب والعمر الجنيته

جيت اهزك يا عمد بيتي

يكون الدهر ظعظع منك للخيانه

وساومت جرحك على الخسه وخفيته

يا بني خلي الجرح ينظف

خله يرعف

خله ينزف

يا بني الجرح اليرفض شداده

علم الثوار يرفرف

يا بني لبن الجلب يرضع من حليبي

ولا ابن يشمر لي خبزه من البراءه

يا بني ياكلني الجلب عظم ولحم

وتموت عيني ولا دناءه

يا بني هاي ايام بفرزنها الكحط أيام محنه

يا بني لا تلثم شرفنا

يا بني يا وليدي البراءه تظل مدى الأيام عفنه

تدري يا بني بكل براءه

كل شهيد من الشعب ينعاد دفنه

وخلي ايدك على شيبي

واحلف بطاهر حليبي

كطرة كطره

وبنظر عيني العميته

الاخت

خوي كابلت السجن

حر وبرد ليلي ونهاري

تحملت لجلك شتايم على عرضي

واشعلت ليلي بنهاري

تالي تهتكني بخلك وصلة جريدة

كرة عيونك يخوي بهاي جازيت انتظاري

بهاي اكابل كل اخت تنتظر منك ثار لعرضها

بهاي اكابل امهات الناس وهمومي افضها

جنت اراضي اتدوس اعظامي

وكلك حيل رضها

جنت ارضي تذبح جنيني

ولا براءة عار متبركع تجيني

ولا تكون الكاع تبلعني ش خبر الناس

والينشد شكله

شلون تجابل عيون المحله

شلون اوصفلك وأنت كلك عار وذله

شلون اوصفلك وأنت كلك عرا وذلك

بعد كالك أرض وبانا وخبز

لا تصل يمنه وهاك أخذ عار الجريده

ولف ضميرك والكرامه

مثل ما تبريت من شعبك

تبرينا من اسمك

يا شعب هذا التشوفه موش ابنا