طول النهار أضمد جروح غيري

ويصيح جرحي لا ضويت آخر الليل

ياما المسا صب السهر في نظيري

واخذ معا لمـّة هجوسي تعاليل

وخلف العيون اللي تراقب مسيري

أحيت مزون العين قاع المناديل

النار فيها من مواقد ضميري

والدرب فيه من الرموش المضاليل

اشيل حلمٍ حاس كسره مريري

كم صكـّت اليمنى إختها... ترثي الحيل

انشبت في بعض المحابيل طيري

واطيري اللي عذّبته المحابيل

كم صـارت العشرة وسيلة عشيري

وعـدّيت مشواري معه كذبة ابريل

خلاص دامه ضاق حتى شويري

باللي تجيبين... اسرعي يامقابيل

عرفت كيف اكون بعيون غيري

من سالفة بدوٍ على ضوّهم ليل